“Ўзавиация” агентлиги Россия томони билан рейслар сонини ошириш бўйича музокаралар ўтказилгани айтилган хабарларни рад этди. Бу ҳақда агентлик матбуот хизмати хабар берди.
Россиянинг “Ведомости” нашри ўз манбаларига таяниб, Ўзбекистон Россия авиация ҳукуматига авиақатновлар сонини оширишни таклиф қилгани ҳақида ёзганди. Хусусан, гап Москва ва Тошкент ўртасидаги рейсларни 25 тадан 50 тага чиқариш ҳақида кетган.
Ўз навбатида “Ўзавиация” агентлиги мазкур маълумотни рад этди.
“Айрим оммавий ахборот воситаларида ‘Ўзавиация’ агентлиги Россия авиация маъмуриятига мамлакатлар ўртасидаги ҳафталик рейслар сонини кўпайтиришни таклиф қилгани ҳақида маълумотлар тарқалди. Ушбу маълумот ҳақиқатга тўғри келмайди”, — дейилади муносабатда.
Шунингдек, агентлик Ўзбекистон оммавий ахборот воситаларидан ваколатли давлат органлари томонидан берилган расмий маълумотларни эълон этишларини қатъий тавсия қилган.
5 май куни Чеченистон ҳукумати раиси Муслим Хучиев Uzbekistan Airways’нинг Россиядаги минтақавий вакили З.Абудуллаев билан учрашувда янги халқаро рейсни йўлга қўйиш ва парвозлар географиясини янада кенгайтириш масалаларини муҳокама қилганди.
Ўшанда Хучиев Тошкент ва Грозний ўртасида мунтазам парвозлар Чеченистон ва Ўзбекистон ўртасидаги йўловчи ташиш ҳажмини оширишга хизмат қилиши ва минтақа иқтисодиёти ривожига қўшимча туртки беришини айтган. Тошкент—Грозний—Тошкент йўналиши бўйича мунтазам парвозлар Uzbekistan Airways самолётларида 26 июндан бошланган.
Изоҳ (0)