Ukraina poytaxti Kiyev shahrining Shevchenko tumani sudida portlash sodir bo‘ldi. Sud binosida ayblanuvchi Igor Gumenyuk granatani portlatib yubordi. Oqibatda u halok bo‘ldi, ikki politsiyachi jarohat oldi.
Gumenyuk 2015-yilda Ukraina Oliy Radasi oldidagi miting vaqtida terakt uyushtirganlikda ayblanayotgan “Sich” ko‘ngillilar batalyoni jangchisi edi.
Qayd etilishicha, sud unga nisbatan qamoqqa olish ehtiyot chorasini uzaytirishi kerak bo‘lgan.
Gumenyuk sud majlisi yakunlangach, hojatxonaga qamalib olgan. Soqchilar uni ushlashga uringanida granata uloqtirib, portlash sodir etgan. So‘ngra paytdan foydalanib, qochishga uringan. Ammo soqchilar quroldan osmonga o‘q uzib, uni to‘xtatib qolgan. Shunda Gumenyuk yana bir xonaga qamalib olgan va biroz vaqt o‘tgach ikkinchi granatani uloqtirgan. Bu safar portlash oqibatida uning o‘zi halok bo‘lgan, ikki nafar politsiyachi jarohat olgan.
Gumenyuk 2015-yilda Oliy Rada oldida terakt uyushtirganlikda ayblangan. Tergov talqiniga ko‘ra, o‘shanda u Milliy Gvardiya xodimlariga qarata granata uloqtirgan. Portlash oqibatida uch gvardiyachi halok bo‘lgan. Gumenyuk barcha ayblovlarni rad qilib kelayotgan edi.
Izoh (0)