Киевдаги суд биносида айбланувчи гранатани портлатиб, ҳалок бўлди

Украина пойтахти Киев шаҳрининг Шевченко тумани судида портлаш содир бўлди. Суд биносида айбланувчи Игорь Гуменюк гранатани портлатиб юборди. Оқибатда у ҳалок бўлди, икки полициячи жароҳат олди. 

Гуменюк 2015 йилда Украина Олий Радаси олдидаги митинг вақтида теракт уюштирганликда айбланаётган “Сич” кўнгиллилар батальони жангчиси эди.

Қайд этилишича, суд унга нисбатан қамоққа олиш эҳтиёт чорасини узайтириши керак бўлган. 

Гуменюк суд мажлиси якунлангач, ҳожатхонага қамалиб олган. Соқчилар уни ушлашга уринганида граната улоқтириб, портлаш содир этган. Сўнгра пайтдан фойдаланиб, қочишга уринган. Аммо соқчилар қуролдан осмонга ўқ узиб, уни тўхтатиб қолган. Шунда Гуменюк яна бир хонага қамалиб олган ва бир оз вақт ўтгач иккинчи гранатани улоқтирган. Бу сафар портлаш оқибатида унинг ўзи ҳалок бўлган, икки нафар полициячи жароҳат олган. 

Гуменюк 2015 йилда Олий Рада олдида теракт уюштирганликда айбланган. Тергов талқинига кўра, ўшанда у Миллий Гвардия ходимларига қарата граната улоқтирган. Портлаш оқибатида уч гвардиячи ҳалок бўлган. Гуменюк барча айбловларни рад қилиб келаётган эди.