Ukraina Sog‘liqni saqlash vazirligining Telegram kanalida e’lon qilingan tavsiyalarda Zaporojye atom elektr stansiyasida portlash sodir bo‘lishi mumkin bo‘lgan hududlar aholisi ehtimoliy evakuatsiyaga tayyor turishi zarurligi aytildi.
“Hukumat radiatsiya avariyasi haqida rasman xabar bergan taqdirda, uyda qoling yoki imkon qadar tezroq yopiq binoga kiring. Keyingi xabarlarni kuzatib boring va rasmiylarning ko‘rsatmalariga amal qiling”, — deyiladi unda. “Hokimiyat buyrug‘iga qadar binolarni tark etish mumkin emas, aholiga evakuatsiya qanday va qayerdan amalga oshirilishi haqida xabar beriladi”.
Aholiga quyidagilarni tayyorlab qo‘yish tavsiya etildi:
- hujjatlar va ularning nusxalari (nafaqat shaxsni tasdiqlovchi hujjatlar, balki tibbiy, mulkiy huquqlar va boshqalar);
- yuz niqobi yoki respirator, shuningdek, birinchi yordam to‘plami va kerakli dori-darmonlar;
- nam salfetkalar;
- almashtirish uchun kiyim va poyabzal;
- minimal darajadagi suv va oziq-ovqat.
Zaporojye atom elektr stansiyasi Rossiya nazorati ostida. Ukraina prezidenti Vladimir Zelenskiy iyun oyida Moskva stansiyada “radiatsiya tarqatish orqali terakt” ssenariysini ko‘rib chiqayotganini aytdi, Kreml matbuot kotibi Dmitriy Peskov bu so‘zlarni yolg‘on deb atadi.
Izoh (0)