Samarqand shahrida o‘tkazilgan to‘ylarning birida mehmonlar uchun yozilgan dasturxon suvli idishdagi tirik baliqlar bilan bezatildi. Bu haqda Telegram’dagi “Ekologuz” kanali xabar berdi.
“Aytishlaricha baliqlarning nobud bo‘lganlari ko‘p ekan. Chunki ularga quyilgan suv ichimlik suvi, baliqlar ichimlik suvida yashay olmaydi”, — deyiladi xabarda.
Samarqand viloyati Ekologiya, atrof-muhitni muhofaza qilish va iqlim o‘zgarishi boshqarmasi mazkur holat yuzasidan o‘rganish ishlarini olib borgan bo‘lib, haqiqatdan ham mazkur voqea Samarqand shahrida joylashgan Life Garden bazmgohida sodir etilganini aniqladi.
Ushbu bazmgoh ish boshqaruvchisining aytishicha, to‘y sohiblarining talabiga binoan 9 dona “petushok” balig‘i to‘y dasturxoniga bezak uchun ijaraga keltirib qo‘yilgan. So‘ngra ushbu baliqlar talafot yetkazilmagan holda egasiga qaytarib berilgan.
Holat to‘g‘ri yoki noto‘g‘riligini tekshirish maqsadida davlat inspektorlari tomonidan o‘rganilganda, ushbu baliqlarga shikast yetkazilmagani ma’lum bo‘lgan.
“Shunday bo‘lishiga qaramay, tabiat jonivorlariga shafqatsiz munosabatda bo‘lganlik uchun to‘y o‘tkazgan fuqaroga va bazmgoh sohibiga nisbatan qonunda belgilangan tartibda tegishli ta’sir choralari ko‘rilib, holat qaytarilmasligi yuzasidan ogohlantirish berib o‘tildi”, — deyiladi munosabatda.
O‘zbekistonda to‘y o‘tkazish tartibi
2019-yilning sentabrida Oliy Majlis Senati kengashi hamda Oliy Majlis Qonunchilik palatasi kengashining qo‘shma majlisida to‘y-hashamlar, oilaviy tantanalar, ma’raka va marosimlar borasida so‘z yuritilgandi. Oktabrda esa Oliy Majlis Senati to‘ylar, oilaviy tantanalar, ma’raka va marosimlar o‘tkazilishini tartibga solish to‘g‘risidagi nizomni e’lon qilgandi. 2020-yil 1-yanvardan boshlab, to‘y-hashamlarni tartibga solish haqidagi Senat va Qonunchilik palatasining qo‘shma qarori (yuridik jihatdan kuchi qonunga teng) kuchga kirgan. Ma’muriy javobgarlik to‘g‘risidagi kodeksda to‘ylarni o‘tkazish tartibini buzganlik uchun javobgarlik belgilangan edi.
Izoh (0)