Buxoro viloyatida o‘tkazilgan to‘ylarning birida mehmonlar uchun yozilgan dasturxon xlorlangan suvli idishdagi baliqlar bilan bezatilgan. Bu haqda Telegram’dagi “Ekologuz” kanali xabar berdi.
Ma’lumotlarga ko‘ra, Buxoro viloyatida joylashgan “Havas” to‘yxonasida 21-yanvar kuni o‘tkazilgan nikoh to‘yida mehmonlar uchun yozilgan dasturxonlarda gazak uchun qo‘yilgan go‘sht mahsulotlari orasida ichimlik ichiladigan idishlarga ikki donadan tirik akvarium baliqlari solib qo‘yilgan.
“To‘yxonada 30 ta stol, unda har bir gazak idishiga ikki donadan baliq solingan bo‘lib, jami 180 dona baliqning uvoliga qoldik. Baliqchalar solingan idishlarga ichimlik suvi solingan edi. Tabiiyki, ichimlik suvi xlorlangan bo‘ladi. Baliqlar esa bu suvda yashay olmaydi va o‘ladi. Kecha ayrim stollardagi baliqchalar o‘lib bo‘lgan edi”, — deyiladi xabarda.
“Ikki soatlik to‘y uchun 180 ta dekorativ baliqchalarni qiynab, o‘limiga sabab bo‘lish, to‘y egasining obro‘sini oshirib, yoshlarni baxtli qiladimi? Aksincha, endigina oila qurayotgan yoshlarni o‘lgan baliqlarning uvoli tutmaydimi?”, — deya ta’kidlanadi xabarda.
Xabarda Buxoro shahar Ekologiya boshqarmasi, Ekopartiya viloyat bo‘limi, ichki ishlardan to‘y sohibi va to‘yxona egasini jarimaga tortib, jazo qo‘llash so‘ralgan.
Eslatib o‘tamiz, 2019-yilning sentabrida Oliy Majlis Senati kengashi hamda Oliy Majlis Qonunchilik palatasi kengashining qo‘shma majlisida to‘y-hashamlar, oilaviy tantanalar, ma’raka va marosimlar borasida so‘z yuritilgandi. Oktabrda esa Oliy Majlis Senati to‘ylar, oilaviy tantanalar, ma’raka va marosimlar o‘tkazilishini tartibga solish to‘g‘risidagi nizomni e’lon qilgandi. 2020-yil 1-yanvardan boshlab, to‘y-hashamlarni tartibga solish haqidagi Senat va Qonunchilik palatasining qo‘shma qarori (yuridik jihatdan kuchi qonunga teng) kuchga kirgan. Ma’muriy javobgarlik to‘g‘risidagi kodeksga to‘ylarni o‘tkazish tartibini buzganlik uchun javobgarlik belgilangan edi.
Izoh (0)