“Navoiy kon-metallurgiya kombinati” kompaniyasining Janubiy kon boshqarmasiga qarashli Samarqand viloyati Qo‘shrabot tumanidagi Zarmitan oltin konida 28-iyun kuni soat 03:30 atrofida ikki yigitning og‘ir tan jarohati olgan holatdagi jasadi topildi. Bu haqda “Daryo”ga Bosh prokuratura matbuot xizmati ma’lum qildi.
Qayd etilishicha, 20 va 24 yoshli yigitlarning jasadlari kon ishchilarining kiyimida va yonlarida ikkita qopda jami 94 kilogramm og‘irlikdagi maʼdan toshlar bo‘lgan holda topilgan. Ularning tarkibida oltin bo‘lgan maʼdanli toshlarni talon-toroj qilish uchun g‘ayriqonuniy ravishda kirgani taxmin qilinmoqda.
Jasadlarni 2-maʼdan yuklash punktiga borib qaytayotgan mashina operatori A.S. aniqlagan. Birlamchi maʼlumotlarga ko‘ra, operator kabinasi mashinaning yon tomonida joylashgan, uning harakat yo‘nalishi qarama-qarshi yon tomonga bo‘lgani sabab ko‘rish radiusida bo‘lmagan joyda yotgan vaqtda bosib o‘tgan bo‘lishi mumkin.
Taʼkidlanishicha, hodisa joyiga tezkor tergov guruhi aʼzolarini hamda Qizilqum kon texnika inspeksiyasi mutaxassislari chiqishi taʼminlangan. Hozirda tergovga qadar tekshiruv harakatlari davom ettirilmoqda.
Halok bo‘lgan fuqarolarning shaxsiga aniqlik kiritilgan — 24 yoshli SH.A. va 20 yoshli I.T. Ular Qo‘shrabot tumani “Mayintepa” qishlog‘ida istiqomat qilib kelgan.
Yanvar boshlarida Qozog‘istonning Aqmola viloyatidagi ishlamayotgan “Bestobe” koni hududida noqonuniy oltin qazib oluvchilar o‘zbekistonlik erkakning jasadini aniqlagandi. Marhumning shaxsiga aniqlik kiritilgan, u 1982-yilda tug‘ilgan O‘zbekiston fuqarosi bo‘lgan.
Izoh (0)