Fukusima stansiyasi operatori Tokyo Electric Power atom energiyasi bo‘yicha Xalqaro agentlikdan (MAGATE) shikastlangan reaktor bloklarini sovutish uchun foydalaniladigan suvni dengizga to‘kish uchun ruxsat olishi kutilmoqda. Bu haqida “Bloomberg” xabar berdi. 4-iyul kuni MAGATE bosh direktori Rafael Mariano Grossi bu masalani hal qilish uchun Yaponiyaga keladi.
Tashrif davomida MAGATE rahbari atom elektr stansiyasiga tashrif buyurib, chiqindi suvlarni dengizga oqizish xavfsizligi bo‘yicha yakuniy hisobotni taqdim etadi, shuningdek, Yaponiya regulyatorining hisobotini tinglaydi. Bloomberg ta’kidlashicha, ushbu ikkala tashkilot ham chiqindi suvlarni dengizga to‘kishni ma’qullashi kutilmoqda.
2011-yildagi zilzila va sunami oqibatida yuzaga kelgan avariyadan so‘ng Fukusima AES hududida shikastlangan reaktorlarni sovutishda foydalaniladigan 1000 dan ortiq suv rezervuarlari to‘planib qolgan, bu taxminan 1,3 million kub metrni tashkil etadi. Yaponiya rasmiylariga ko‘ra, 2024-yil boshida barcha rezervuarlar to‘ldiriladi.
Ularda saqlanadigan suv yaxshilab tozalangan, ammo unda hali ham vodorodning radioaktiv izotopi - tritiy bor, bu modda izsiz yo‘qolib ketmaydi. Yaponiya hukumati bu suvni dengizga to‘kish zarurligini ta’kidlab, bu dunyoning boshqa atom elektr stansiyalarida ham odatiy hol ekanini ta’kidlamoqda. Bundan tashqari, ushbu suvni oqizib yubormasdan turib, atom elektr stansiyasidan foydalanishni to‘xtatib bo‘lmaydi.
Izoh (0)