Фукусима станцияси оператори Tokyo Electric Power атом энергияси бўйича Халқаро агентликдан (МАГАТЭ) шикастланган реактор блокларини совутиш учун фойдаланиладиган сувни денгизга тўкиш учун рухсат олиши кутилмоқда. Бу ҳақида Bloomberg хабар берди. 4 июль куни МАГАТЭ бош директори Рафаэл Мариано Гросси бу масалани ҳал қилиш учун Японияга келади.
Ташриф давомида МАГАТЭ раҳбари атом электр станциясига ташриф буюриб, чиқинди сувларни денгизга оқизиш хавфсизлиги бўйича якуний ҳисоботни тақдим этади, шунингдек, Япония регуляторининг ҳисоботини тинглайди. Bloomberg таъкидлашича, ушбу иккала ташкилот ҳам чиқинди сувларни денгизга тўкишни маъқуллаши кутилмоқда.
2011 йилдаги зилзила ва сунами оқибатида юзага келган авариядан сўнг Фукусима АЭС ҳудудида шикастланган реакторларни совутишда фойдаланиладиган 1000 дан ортиқ сув резервуарлари тўпланиб қолган, бу тахминан 1,3 миллион куб метрни ташкил этади. Япония расмийларига кўра, 2024 йил бошида барча резервуарлар тўлдирилади.
Уларда сақланадиган сув яхшилаб тозаланган, аммо унда ҳали ҳам водороднинг радиоактив изотопи - тритий бор, бу модда изсиз йўқолиб кетмайди. Япония ҳукумати бу сувни денгизга тўкиш зарурлигини таъкидлаб, бу дунёнинг бошқа атом электр станцияларида ҳам одатий ҳол эканини таъкидламоқда. Бундан ташқари, ушбу сувни оқизиб юбормасдан туриб, атом электр станциясидан фойдаланишни тўхтатиб бўлмайди.
Изоҳ (0)