Hozirgi kunda O‘zbekistonda pensiya va nafaqa oluvchilarning umumiy soni 4 million 447 ming 597 nafarni tashkil qilmoqda. Bu haqda Pensiya jamg‘armasi xabar berdi.
Maʼlum qilinishicha, bugungi kunda respublikada pensiya oluvchilar soni 3 million 839 ming 508 nafarni, nafaqa oluvchilar 608 ming 89 nafarni tashkil qilmoqda.
Joriy yilning 1-iyun holatiga ko‘ra,
- yoshga doir pensiya oluvchilar 3 millon 182 ming 617 nafar,
- nogironlik pensiyasini oluvchilar 426 ming 532 nafar,
- boquvchisini yo‘qotganlik pensiyasini oluvchilar 230 ming 359 nafardir.
Avvalroq 2023-yilning 1-aprelidan pensiya va nafaqalar miqdori 7 foizga oshirilishi xabar qilingandi. Bunda pensiyani hisoblashning bazaviy miqdori oyiga 347 ming so‘m, yoshga doir eng kam pensiya miqdori 677 ming so‘m va nogironlik pensiyasi, jumladan, ish staji to‘liq bo‘lmagan chog‘dagi pensiyaning eng kam miqdori 747 ming etib belgilangan. Nafaqasi oshadigan fuqarolar soni 4 million 400 nafarni tashkil etishi aytilgan.
Eslatib o‘tamiz, 2023-yil uchun “O‘zbekiston Respublikasining Davlat budjeti to‘g‘risida”gi qonunga asosan, Pensiya jamg‘armasiga davlat budjetidan transfertlar miqdori 15 trillion so‘m bo‘lishi ko‘zda tutilgan. Iqtisodiyot va moliya vaziri o‘rinbosari Dilshod Sultonov shu yilning mart oyidagi matbuot anjumanida Pensiya jamg‘armasi uhhun 14,5 trillion so‘m tashqi qarz jalb qilinishini maʼlum qilgan.
Tashqi qarzning 3 milliard dollardan ortiq qismi budjetni qo‘llab-quvvatlashga sarflanadi. Masalan, bu yilgi ikkita yirik xarajatdan biri – pensiya Jamg‘armasiga beradigan transfertimiz 15 trillion so‘m bo‘lishi ko‘zda tutilmoqda. Sababi aholi faollik bilan soliq to‘lashga kirib kelmayapti. Ko‘pchilik oylikni yashiradi, soliq to‘lamaslikka harakat qiladi va oylikni past ko‘rsatadi. Shuning hisobiga pensiyaning taqchilligi katta bo‘lyapti, — degan vazir o‘rinbosari.
Ma’lumot uchun, hozirda davlat tashkilotlarida ishlayotgan xodimlarning 5 foizi pensiya yoshidagilar hisoblanadi.
Izoh (0)