UzAuto Motors Asakadagi zavodda avtomobil ishlab chiqarish vaqtincha to‘xtatilishini xabar qildi.
Kompaniya xabariga ko‘ra, zavod modernizatsiya qilinadi va avtomobil ishlab chiqarish quvvatlari oshiriladi.
“UzAuto Motors AJ Janubiy Koreya va boshqa mamlakatlardan jalb etilgan 170 nafar mutaxassis bilan hamkorlikda Asaka shahridagi zavodining ishlab chiqarish liniyalarini rejali modernizatsiya qilishni yo‘lga qo‘ymoqda. Ishlab chiqarish quvvatlarini oshirish, barqaror ishlab chiqarishni taʼminlash hamda konveyerlarning ishdan chiqishini oldini olish maqsadida korxonada texnik ishlar olib borilishi natijasida ishlab chiqarish liniyalarining ishlashi vaqtincha to‘xtatiladi. Ushbu modernizatsiya Chevrolet Cobalt avtomobillarining yillik ishlab chiqarish hajmini qo‘shimcha 30 ming donaga oshirish imkonini beradi”— deyiladi kompaniya xabarida.
Maʼlum qilinishicha, modernizatsiya jarayonida yangi uskunalardagi nosozliklarni bartaraf etish, ishlab chiqarish liniyalariga texnik xizmat ko‘rsatish va zavod infrastrukturasini yangilash ishlari bajariladi.
“Mazkur ishlar rejalashtirilgan va isteʼmolchilarga avtomobillarni yetkazib berish jadvaliga taʼsir qilmaydi”, — deya qo‘shimcha qilgan kompaniya.
Avvalroq joriy yilning yanvar—may oylarida eng ko‘p ishlab chiqarilgan avtomobil Cobalt (39 ming 264 dona) bo‘lgani xabar qilingandi. Keyingi o‘rinlarda Lacetti (27 ming 961 dona) va Damas (26 ming 815 dona) ishlab chiqarilgan. Biroq mazkur avtomobillar sotuvda mavjud emas. UzAuto Motors 2022-yil 17-dekabrda Cobalt, Lacetti, Damas avtomobillari sotuvini to‘xtatgan. Kompaniya 2023-yildan Spark va Nexia o‘rniga Tracker va Onix ishlab chiqarishini maʼlum qilgan. Hozirda Tracker va Onix sotuvda mavjud. Ammo narxi 200 million so‘mdan yuqori bo‘lgan bu avtomobillar uchun navbat katta bo‘lib, to‘lov qilgan mijoz mashinasini olishni 1—1,5 yil kutishiga to‘g‘ri keladi.
Izoh (0)