Toshkentda Yoshlar kuni bepul bo‘lgan avtobuslarning xarajatlari kimning hisobidan qoplanishi maʼlum qilindi

Toshkent shahrida 30-iyun Yoshlar kuni munosabati bilan 14 yoshdan 30 yoshgacha bo‘lgan fuqarolar avtobuslardan bepul foydalandi.

Yoshlar avtobuslardan bepul foydalanishi mumkinligi haqida 1-iyundagi hukumat majlisi bayonotida ko‘zda tutilgan. Bunda yo‘lovchilarning yoshi qanday aniqlanishiga oydinlik kiritilmagan.

“Toshshahartransxizmat” jamiyati axborot xizmati rahbari Muslima Obidovaning “Daryo”ga ma‘lum qilishicha, avtobuslar xizmatidan foydalanishda yosh toifasini belgilash bo‘yicha aniq yo‘riqnoma belgilanmagan.

“Ko‘rinishga qarab aniqlanishi bo‘yicha ko‘rsatma berilgan. Agar qandaydir tushunmovchilik bo‘lsa, o‘zini 30 yoshga to‘lmaganini aytgan bo‘lsa, undan chiptachilar yo‘lkira uchun haq olmasliklari aytilgan”, — dedi Muslima Obidova.

Uning qo‘shimcha qilishicha, yoshlarga ko‘rsatilgan bepul xizmatlar uchun sarflangan xarajatlar Toshkent shahri hokimligi tomonidan qoplab beriladi.

Avvalroq “O‘ztemiryo‘lyo‘lovchi” Yoshlar kuni munosabati bilan yoshlarga chegirma e‘lon qilgandi.