Ukraina tashqi ishlar vaziri Dmitriy Kuleba Germaniyani Ukrainani NATOga qo‘shilishiga to‘sqinlik qilishga urinishdan ogohlantirdi. Bu haqda TIV rahbari Bild’ga bergan intervyusida aytib o‘tdi.
“Sobiq kansler Angela Merkel 2008-yilda Buxarestda Ukrainaning NATOga a’zo bo‘lishi yo‘lidagi har qanday harakatga keskin qarshi chiqqan xatosini takrorlamang”, — dedi Kuleba.
Vazir Merkel tom ma’noda Rossiyaning Gruziyaga bostirib kirishi va Qrimning noqonuniy anneksiya qilinishi uchun eshik ochganini aytdi.
“Agar Ukraina 2014-yilda NATO aʼzosi bo‘lganida, keng ko‘lamli urushning oldini olish mumkin edi”, — dedi u.
Kulebaning so‘zlariga ko‘ra, Kiyev urush paytida NATOga aʼzo bo‘lishini ko‘zlamaydi.
“Urushdan keyin Ukrainani NATOga qabul qilmaslik Yevropa uchun o‘z joniga qasd qilish bo‘ladi. NATOdan tashqaridagi Ukraina urush hali ham bo‘lishi mumkinligini anglatadi. Rossiyaning butun Yevropaga qarshi tajovuz eshigini yopishning yagona yo‘li bu Ukrainaning NATOga a’zo bo‘lishidir”, — dedi Ukraina TIV rahbari.
“Bu tinchlikka yo‘l. Rossiya NATO tarkibida bo‘lgan Ukrainaga yana hujum qilishga jur’at eta olmaydi. Ukraina sharqiy qanotni himoya qilishda Germaniya va boshqa G‘arbiy NATO davlatlariga tayanadi. Biz bu yukni o‘z yelkamizga olamiz”, — deya xulosa qildi Kuleba.
Izoh (0)