Украина ташқи ишлар вазири Дмитрий Кулеба Германияни Украинани НАТОга қўшилишига тўсқинлик қилишга уринишдан огоҳлантирди. Бу ҳақда ТИВ раҳбари Билдъга берган интервьюсида айтиб ўтди.
“Собиқ канцлер Ангела Меркель 2008 йилда Бухарестда Украинанинг НАТОга аъзо бўлиши йўлидаги ҳар қандай ҳаракатга кескин қарши чиққан хатосини такрорламанг”, — деди Кулеба.
Вазир Меркель том маънода Россиянинг Грузияга бостириб кириши ва Қримнинг ноқонуний аннексия қилиниши учун эшик очганини айтди.
“Агар Украина 2014 йилда НАТО аъзоси бўлганида, кенг кўламли урушнинг олдини олиш мумкин эди”, — деди у.
Кулебанинг сўзларига кўра, Киев уруш пайтида НАТОга аъзо бўлишини кўзламайди.
“Урушдан кейин Украинани НАТОга қабул қилмаслик Европа учун ўз жонига қасд қилиш бўлади. НАТОдан ташқаридаги Украина уруш ҳали ҳам бўлиши мумкинлигини англатади. Россиянинг бутун Европага қарши тажовуз эшигини ёпишнинг ягона йўли бу Украинанинг НАТОга аъзо бўлишидир”, — деди Украина ТИВ раҳбари.
“Бу тинчликка йўл. Россия НАТО таркибида бўлган Украинага яна ҳужум қилишга журъат эта олмайди. Украина шарқий қанотни ҳимоя қилишда Германия ва бошқа Ғарбий НАТО давлатларига таянади. Биз бу юкни ўз елкамизга оламиз”, — дея хулоса қилди Кулеба.
Изоҳ (0)