Favqulodda vaziyatlar vazirligi maxsus vazifalar bo‘yicha guruhi Toshkent shahridagi G‘afur G‘ulom nomidagi istirohat bog‘ida o‘quv mashg‘uloti o‘tkazdi. Bu haqda “Daryo” muxbiri xabar bermoqda.
FVV matbuot xizmati boshlig‘i o‘rinbosari Samandar Hikmatullayev aytishicha, mashg‘ulotdan ko‘zlangan asosiy maqsad — tinchlik vaqtida, yaʼni favqulotda vaziyat sodir bo‘lmagan vaqtda qutqaruv kuchlarining mahoratini oshirish.
Maxsus guruh ehtiyotsizlik oqibatida yoki cho‘milish vaqtida suvga cho‘kib ketgan insonlarni qay tartibda qutqarish va ularga birinchi yordam ko‘rsatish bo‘yicha mashg‘ulot o‘tkazdi.
“Cho‘kkan inson bir necha soniyalar ichida o‘z hushuni yo‘qotadi. Agar suvga cho‘kkan insonni 5 daqiqa ichida suvdan olib chiqib, birinchi yordamni ko‘rsatolmasak uni hayotga qaytarishga kech qolishimiz mumkin”, — dedi Samandar Hikmatullayev.
FVV vakilining taʼkidlashicha, suvga cho‘kkan odamning nafas olishi to‘xtaydi.
“O‘z vaqtida o‘pka yurak reanimatsiyasini o‘tkazmasak — miyaga 5 daqiqa ichida kislorod yetib bormasa to‘qimalar o‘lishni boshaydi. Birinchi yordam 5-7 daqiqadan keyin amalga oshirilsa, insonni hayotga qaytarish imkoniyati kamayib ketadi. Yaʼni bu jarayonda klinik o‘limga uchragan inson biologik o‘limga o‘tib ketadi”, — dedi Samandar Hikmatullayev.
Diqqat, oqar suvlarda cho‘milmang!
Respublikamizda cho‘milishga ruxsat etilgan va cho‘milish taqiqlangan ochiq suv havzalari bor. Cho‘milish taqiqlangan havzalarimiz: daryolar, ariqlar, kanallar. Bunday joylarda cho‘milish taqiqlanadi. Yaʼni oqar suv havzalarida cho‘milish mumkin emas.
“Biz bu yerda doim cho‘milamiz, kecha ham shu yerda cho‘mildik. Bu joy xavfsiz edi”, deyishadi. Bu joy kecha xavfsiz bo‘lgan bo‘lishi mumkin. Kecha xavfsiz bo‘lgan o‘sha joyga har xil xarsang toshlar yoki qurilish chiqindilari oqib kelgan bo‘lishi mumkin.
Suvda cho‘kish holatlarining barchasini mukammal o‘rganamiz. Ko‘p hollarda cho‘kkan insonlar suvdan olib chiqilganda ularning sho‘ng‘ish paytida suvning ostidagi predmetlarga urilib ketishi natijasida bosh va qorin qismidan olingan jarohatlarga duch kelamiz.
Ruxsat etilgan suv havzalarida maxsus qutqaruvchilar bo‘ladi. Ushbu joylarning tubi tozalab turiladi. Shuningdek, ushbu joylarda qutqaruv minorasi bo‘ladi. Yaʼni birga cho‘milayotgan odam yonidagi do‘stining cho‘kib ketayotganini sezmay qolishi mumkin. Qutqaruv minorasida o‘tirgan masʼul shaxs unga o‘z vaqtida yordam ko‘rsatishni tashkillashtiradi.
Izoh (0)