Фавқулодда вазиятлар вазирлиги махсус вазифалар бўйича гуруҳи Тошкент шаҳридаги Ғафур Ғулом номидаги истироҳат боғида ўқув машғулоти ўтказди. Бу ҳақда “Дарё” мухбири хабар бермоқда.
ФВВ матбуот хизмати бошлиғи ўринбосари Самандар Ҳикматуллаев айтишича, машғулотдан кўзланган асосий мақсад — тинчлик вақтида, яъни фавқулотда вазият содир бўлмаган вақтда қутқарув кучларининг маҳоратини ошириш.
Махсус гуруҳ эҳтиётсизлик оқибатида ёки чўмилиш вақтида сувга чўкиб кетган инсонларни қай тартибда қутқариш ва уларга биринчи ёрдам кўрсатиш бўйича машғулот ўтказди.
“Чўккан инсон бир неча сониялар ичида ўз ҳушуни йўқотади. Агар сувга чўккан инсонни 5 дақиқа ичида сувдан олиб чиқиб, биринчи ёрдамни кўрсатолмасак уни ҳаётга қайтаришга кеч қолишимиз мумкин”, — деди Самандар Ҳикматуллаев.
ФВВ вакилининг таъкидлашича, сувга чўккан одамнинг нафас олиши тўхтайди.
“Ўз вақтида ўпка юрак реанимациясини ўтказмасак — мияга 5 дақиқа ичида кислород етиб бормаса тўқималар ўлишни бошайди. Биринчи ёрдам 5-7 дақиқадан кейин амалга оширилса, инсонни ҳаётга қайтариш имконияти камайиб кетади. Яъни бу жараёнда клиник ўлимга учраган инсон биологик ўлимга ўтиб кетади”, — деди Самандар Ҳикматуллаев.
Диққат, оқар сувларда чўмилманг!
Республикамизда чўмилишга рухсат этилган ва чўмилиш тақиқланган очиқ сув ҳавзалари бор. Чўмилиш тақиқланган ҳавзаларимиз: дарёлар, ариқлар, каналлар. Бундай жойларда чўмилиш тақиқланади. Яъни оқар сув ҳавзаларида чўмилиш мумкин эмас.
“Биз бу ерда доим чўмиламиз, кеча ҳам шу ерда чўмилдик. Бу жой хавфсиз эди”, дейишади. Бу жой кеча хавфсиз бўлган бўлиши мумкин. Кеча хавфсиз бўлган ўша жойга ҳар хил харсанг тошлар ёки қурилиш чиқиндилари оқиб келган бўлиши мумкин.
Сувда чўкиш ҳолатларининг барчасини мукаммал ўрганамиз. Кўп ҳолларда чўккан инсонлар сувдан олиб чиқилганда уларнинг шўнғиш пайтида сувнинг остидаги предметларга урилиб кетиши натижасида бош ва қорин қисмидан олинган жароҳатларга дуч келамиз.
Рухсат этилган сув ҳавзаларида махсус қутқарувчилар бўлади. Ушбу жойларнинг туби тозалаб турилади. Шунингдек, ушбу жойларда қутқарув минораси бўлади. Яъни бирга чўмилаётган одам ёнидаги дўстининг чўкиб кетаётганини сезмай қолиши мумкин. Қутқарув минорасида ўтирган масъул шахс унга ўз вақтида ёрдам кўрсатишни ташкиллаштиради.
Изоҳ (0)