Namanganda 1200 o‘rinli test sinovlari markazi barpo etildi

Namangan shahrining Davlatobod tumanidagi “Yuksalish” dahasida test sinovlari markazi barpo etildi. Bu haqda “Daryo” muxbiri Azizbek Abduvaliyev xabar bermoqda.

2 gektar maydonni egallagan markaz 1 200 o‘ringa mo‘ljallangan bo‘lib, bunday inshoot hozircha faqat Buxoro va Xorazmda barpo etilgan. Markaz yuqori tezlikdagi internet tarmog‘iga ulangan, qo‘shimcha energiya zaxirasiga ega, kuzatuv kameralari va videoqayd uskunalari bilan jihozlangan.

Shuningdek, ushbu binoda Bilim va malakalarni baholash agentligi Namangan viloyat bo‘limi ham joylashadi.

“Markazdagi ish jarayoni joriy yil 15-iyul kuni Prezident maktabiga imtihonlar bilan boshlanadi. Bu avgust oyida bo‘lib o‘tadigan oliy taʼlim muassasalariga kirish imtihonlariga o‘ziga xos tayyorgarlik vazifasini o‘taydi. Keyinchalik bu binodan yil davomida turli tadbirlar, jumladan, o‘qituvchilarning sertifikat olish, chet tili sinovlarida foydalaniladi”, — deydi viloyat bo‘limi boshlig‘i Bunyodbek Abdulhafizov.

Maʼlumot uchun, Namanganda joriy yil 77 mingdan ortiq abituriyent OTMlarga hujjat topshirishi kutilmoqda. Yangi barpo etilgan markazdan tashqari Namangan muhandislik-qurilish instituti akademik litseyi va Namangan shahridagi “Barkamol avlod” sport majmuasi binolari ham test sinovlarini o‘tkazish uchun tayyorlanmoqda.