Наманган шаҳрининг Давлатобод туманидаги “Юксалиш” даҳасида тест синовлари маркази барпо этилди. Бу ҳақда “Дарё” мухбири Азизбек Абдувалиев хабар бермоқда.
Фото: Жаҳонгир Акрамов
2 гектар майдонни эгаллаган марказ 1 200 ўринга мўлжалланган бўлиб, бундай иншоот ҳозирча фақат Бухоро ва Хоразмда барпо этилган. Марказ юқори тезликдаги интернет тармоғига уланган, қўшимча энергия захирасига эга, кузатув камералари ва видеоқайд ускуналари билан жиҳозланган.
Шунингдек, ушбу бинода Билим ва малакаларни баҳолаш агентлиги Наманган вилоят бўлими ҳам жойлашади.
Фото: Жаҳонгир Акрамов
“Марказдаги иш жараёни жорий йил 15 июль куни Президент мактабига имтиҳонлар билан бошланади. Бу август ойида бўлиб ўтадиган олий таълим муассасаларига кириш имтиҳонларига ўзига хос тайёргарлик вазифасини ўтайди. Кейинчалик бу бинодан йил давомида турли тадбирлар, жумладан, ўқитувчиларнинг сертификат олиш, чет тили синовларида фойдаланилади”, — дейди вилоят бўлими бошлиғи Бунёдбек Абдулҳафизов.
Фото: Жаҳонгир Акрамов
Маълумот учун, Наманганда жорий йил 77 мингдан ортиқ абитуриент ОТМларга ҳужжат топшириши кутилмоқда. Янги барпо этилган марказдан ташқари Наманган муҳандислик-қурилиш институти академик лицейи ва Наманган шаҳридаги “Баркамол авлод” спорт мажмуаси бинолари ҳам тест синовларини ўтказиш учун тайёрланмоқда.
Изоҳ (0)