Samarqandda maktabni a’lo baholarga tugatgan o‘quvchiga oltin medal berilmagani aytildi

Samarqand viloyatidagi umumta’lim maktablarining birida maktabni a’lo baholarga tugatgan o‘quvchiga oltin medal berilmagani aytildi. Viloyat Maktabgacha va maktab ta’limi boshqarmasi holat yuzasidan tushuntirish berdi. 

Samarqand shahridagi 29-umumta’lim maktab ma’muriyatining ma’lum qilishicha, Mirzomuso Olimov 2018/2019-o‘quv yilida (7-sinfda) tasviriy san’at fanidan oraliq nazoratidan 4 baho olgan. 2019/2020-o‘quv yilida (8-sinfda) adabiyot, o‘zbek tili va fizika fanlaridan 4 baho, 2019-yil 29-noyabr kuni adabiyot fanidan, 2020-yil 20-yanvar va 20-fevral kunlari o‘zbek tili fanlaridan 2 baho olgan. 2020/2021-o‘quv yilida o‘zbek tili, ingliz tili, informatika, geografiya, fizika, iqtisodiyot fanlaridan oraliq nazorat ishlaridan 4 baho olgan. 

Ushbu sabablarga ko‘ra, Vazirlar Mahkamasining 2017-yil 15-martidagi 140-sonli qaroriga asosan, 9-sinfni bitirishda imtiyozli shahodatnoma berilmagan. Maktabni oltin medal bilan bitirish talablaridan biri o‘quvchi 9-sinfni imtiyozli shahodatnoma bilan tamomlashi lozim ekani ta’kidlangan.