Qarshida tadbirkorlik faoliyatini qonunga xilof ravishda qayta tekshirgan mansabdor shaxs jarimaga tortildi. Bu haqda Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish bo‘yicha vakil xabar berdi.
Maʼlumki, prezidentning 2022-yil 13-sentabrdagi qaroriga ko‘ra, nazorat qiluvchi organlar tadbirkorlik subyektining ilgari tekshirilgan faoliyat davridagi predmeti va obyekti bo‘yicha qayta tekshiruv o‘tkazishga va tadbirkorlik subyekti tomonidan avval taqdim etilgan hujjatlarni talab qilishga haqli emas. Biznes-ombudsmanning ma’lum qilishicha, shunga qaramay, ayrim nazorat organlari tomonidan tadbirkorlik subyektlarini qonunga xilof ravishda qayta-qayta tekshirish holatlari uchramoqda.
Xususan, Qarshi shahrida faoliyat yurituvchi “P.B.D” MCHJning (nomi o‘zgartirilgan) faoliyati soliq organi tomonidan muqaddam kameral soliq tekshiruvidan o‘tkazilgan bo‘lsa-da, Qashqadaryo viloyati soliq boshqarmasi mansabdor shaxsi tadbirkorlik subyektining mazkur davrdagi faoliyatini qonunga xilof ravishda qayta tekshirish tashabbusi bilan chiqqan.
Shu bois Biznes-ombudsman devoni tomonidan maʼmuriy javobgarlikka tortilib, unga nisbatan BHMning 20 baravari (6,6 million so‘m)miqdorida jarima jazosi tayinlandi.
Bundan tashqari, “P.B.D” MCHJda qonunga xilof ravishda boshlangan kameral soliq tekshiruvi tugatilgan.
Izoh (0)