O‘zbekistonda ommaviy axborot vositalari vakillari uchun qator tanlovlar joriy qilinadi. Bu haqda “Huquqiy axborot” Telegram-kanalida xabar berildi.
Unga ko‘ra, Vazirlar Mahkamasi qarori bilan OAVni qo‘llab-quvvatlash va jurnalistika sohasini rivojlantirish bo‘yicha nizomlar tasdiqlandi. Xususan, Bolalar uchun mo‘ljallangan eng yaxshi tele va radioloyiha tanlovini tashkil etish va o‘tkazish tartibi to‘g‘risidagi nizom. Bunda tanlov 2 yo‘nalishda – “bolalarga mo‘ljallangan eng yaxshi teleloyiha” va “bolalarga mo‘ljallangan eng yaxshi radioloyiha” nominatsiyalarida tashkil etilib, jami 30 ta eng yaxshi loyiha moliyalashtiriladi. Tanlov har yili iyul—avgust oylarida, g‘oliblarni taqdirlash sentabrda o‘tkaziladi.
Yana bir nizom — Ommaviy axborot vositalarida eʼlon qilingan eng yaxshi material tanlovini tashkil etish va o‘tkazish tartibi to‘g‘risida. Shunga ko‘ra, tanlov har yili chorak yakuni bo‘yicha quyidagi yo‘nalishlarda o‘tkaziladi:
- gazeta va jurnallarda chop etilgan materiallar;
- telekanallarda efirga uzatilgan materiallar;
- radiokanallarda efirga uzatilgan materiallar;
- veb-saytlarda eʼlon qilingan materiallar.
Bunda har bir yo‘nalish bo‘yicha g‘oliblar tegishlicha BHMning 50 baravari (1-o‘rin), 40 baravari (2-o‘rin) va 30 baravari (3-o‘rin) miqdorida rag‘batlantiriladi. Shuningdek, har bir yo‘nalish bo‘yicha 5 tadan 22 tagacha sovrindorlar aniqlanib, ular BHMning 10 baravari miqdorida rag‘batlantirilishi nazarda tutilgan.
Bundan tashqari, OAV xodimlarining xorijiy tillarni o‘rganish hamda xorijiy tillar bo‘yicha tegishli milliy yoki xalqaro sertifikatga ega bo‘lish uchun imtihon topshirish xarajatlarini qoplash tartibi to‘g‘risidagi nizom ham tasdiqlandi. Nizomga muvofiq, OAVda kamida 1 yil davomida asosiy ish joyi sifatida ishlab kelayotgan xodimlarning xorijiy tillarni o‘rganish xarajatlarining 50 foizi, biroq BHMning 15 baravaridan oshmagan qismi kompensatsiya qilinadi. Bunda ular xorijiy tillar bo‘yicha B2 va undan yuqori darajadagi sertifikatga ega bo‘lishi lozim.
Jismoniy shaxslar tomonidan davriy bosma nashrlar, kitob va boshqa matbaa mahsulotlariga elektron tarzda obuna bo‘lish hamda davriy bosma nashrlar uchun obuna xarajatlarining bir qismini qaytarib berish tartibi to‘g‘risidagi nizomga ko‘ra, “Obuna” yagona elektron platformasi va uning mobil ilovasi orqali davriy bosma nashrlarga obuna xarajatlarining qaytariladigan miqdori obuna rasmiylashtirilganidan 1 oy o‘tib shakllantiriladi. Obuna xarajatlarining bir qismi quyidagi miqdorlarda qaytariladi:
- ijtimoiy-siyosiy, maʼnaviy-maʼrifiy, adabiy-badiiy, huquqiy, ilmiy-ommabop davriy bosma nashrlar – obuna narxining 10 foizi miqdori;
- bolalarga mo‘ljallangan davriy bosma nashrlar – obuna narxining 20 foizi miqdori.
Shu bilan birgalikda davlat organlari va tashkilotlari muassisligida bo‘lmagan davriy bosma nashrlarning zamonaviy elektron shakllarini yaratish, ularni modernizatsiya qilish va bir yil davomida yuritish xarajatlarini qoplash tartibi to‘g‘risidagi vaqtinchalik nizom ham tasdiqlandi. Bunda har yili eng yaxshi 20 ta loyihani aniqlash bo‘yicha tanlov eʼlon qilinib, g‘olib loyihalarga O‘zbekistonning axborot sohasi va ommaviy kommunikatsiyalarni rivojlantirishni qo‘llab-quvvatlash jamg‘armasi hisobidan mablag‘ ajratiladi.
Izoh (0)