Qozog‘iston Suriya bo‘yicha Rossiya, Eron va Turkiya tomonidan 2017-yildan beri Ostonada olib borilayotgan va Ostona jarayoni deb atalgan muzokaralarni yakunlash kerak, deb hisoblaydi. Qozog‘iston tashqi ishlar vaziri o‘rinbosari Kanat Tumishev 21-iyun, chorshanba kuni Ostona formatidagi 20-yig‘ilishda so‘zga chiqib, uni oxirgisi deb e’lon qilishni rasman taklif qildi, chunki Tumishevning aytishicha, “Ostona jarayoni o‘z vazifasini sharaf bilan bajargan”.
Tumishev Suriyaning “mintaqadagi izolyatsiyadan bosqichma-bosqich chiqib, arab oilasiga qaytishi”ni, ya’ni 2023-yilning may oyida Suriyaning Arab Davlatlari Ligasiga qayta a’zo bo‘lganini muzokaralarni yakunlash belgisi, deb atadi.
O‘z navbatida, Rossiya prezidentining Suriya bo‘yicha maxsus vakili Aleksandr Lavrentiyev Ostona formati ishlashda davom etishini, biroq yangi platforma izlashini aytdi.
“Agar Qozog‘istonning qarori, ularning fikricha, hozir, maqbulroq joyga ko‘chirish bo‘lsa, biz maslahatlashib, boshqa joyni tanlaymiz”, — dedi Lavrentiyev.
Unga ko‘ra, Ostona formatidagi navbatdagi uchrashuv 2023-yilning ikkinchi yarmida bo‘lib o‘tadi, lekin Qozog‘iston hududida emas. “Bu Moskva, Tehron, Anqara, Damashq bo‘lishi mumkin”, — dedi Putinning maxsus vakili. Shu bilan birga, u Qozog‘istonning Ostona formatini boshqa joyga ko‘chirish taklifi o‘zi uchun kutilmagan hol bo‘lganini tan oldi.
Izoh (0)