Toshkentda hayit namozi o‘qilishi munosabati bilan maxsus avtobus yo‘nalishlari tashkil etiladi

“Toshshahartransxizmat” Qurbon hayiti namozi o‘qilishi munosabati bilan maxsus avtobus yo‘nalishlari tashkil etilishini e’lon qildi.

Ma’lum qilinishicha, 28-iyun kuni Qurbon hayiti nishonlanishi munosabati bilan yo‘lovchilar tashish uzluksizligini taʼminlash va aholiga ko‘rsatilayotgan transport xizmatlari sifatini oshirish maqsadida Toshkent shahridagi 151 ta avtobus yo‘nalishlariga jami 1060 ta avtobus ishga chiqarilishi belgilangan bo‘lib, avtobus yo‘nalishlarining faoliyati soat 4:00 dan boshlab yo‘lga qo‘yiladi.

Bundan tashqari, hayit namozi o‘qilishi munosabati bilan masjidlarga kelib-ketishda poytaxt aholisiga qoshimcha qulaylik yaratish maqsadida Toshkentda joylashgan 100 ga yaqin masjidlarga soat 03:00 dan soat 05:00 gacha bo‘lgan vaqt mobaynida vaqtinchalik 60 ta maxsus avtobus yo‘nalishlari tashkil etilib, ushbu yo‘nalishlarga 160 dona avtobus chiqariladi.

“Toshshahartransxizmat” Qurbon hayiti namoziga tashrif buyurishda ushbu avtobuslardan foydalanishni tavsiya qildi.

Qurbon hayiti kuni yo‘lovchilarga qulaylik yaratish maqsadida Toshkent metropoliteni tonggi soat 04:00 dan kech soat 00:00 ga qadar doimiy jadval asosida o‘z ish faoliyatini olib boradi.