AQSH razvedka idoralari COVID-19 pandemiyasining Uxan virusologiya institutidagi hodisadan kelib chiqqanini isbotlovchi dalil topa olmadi. Bu haqda Milliy razvedka direktori idorasining hisobotida ma’lum qilindi. To‘rt sahifali hujjatda aytilishicha, razvedka virusning laboratoriyadan tarqalgani versiyasini inkor ham etolmaydi.
“Markaziy razvedka boshqarmasi va boshqa idoralar COVID-19 pandemiyasining aniq manbasini topa olmayapti, chunki ikkala faraz ham (tabiiy va laboratoriya kelib chiqishi) muhim taxminlarga tayanadi”, — deyiladi hujjatda.
Hisobotda aytilishicha, Uxan instituti chindan ham koronaviruslar bo‘yicha tadqiqot olib borgan, biroq aynan shu institut COVID-19 pandemiyasining boshlanishiga sabab bo‘lgani haqida hech qanday dalil topilmagan.
2021-yilda Jahon sog‘liqni saqlash tashkiloti o‘z hisobotida COVD-19 ning laboratoriyadan kelib chiqishi ehtimolini “juda past” deb baholagan edi. JSST fikricha, virus odamlarga ko‘rshapalaklardan boshqa hayvon vositasida yuqqan.
2023-yil fevral oyida tashkilot koronavirusning kelib chiqishi bo‘yicha tekshiruvni “ma’lumotlar yig‘ish bilan bog‘liq muammolar” tufayli to‘xtatdi. Tashkilotning taʼkidlashicha, Xitoy rasmiylari JSST bilan hamkorlikni to‘xtatgani sababli tergovning ikkinchi bosqichi to‘xtatilgan. Xitoy esa bu masalani siyosiylashtirmaslikka chaqirdi.
Izoh (0)