Қозоғистон Сурия бўйича Россия, Эрон ва Туркия томонидан 2017 йилдан бери Остонада олиб борилаётган ва Остона жараёни деб аталган музокараларни якунлаш керак, деб ҳисоблайди. Қозоғистон ташқи ишлар вазири ўринбосари Канат Тумишев 21 июнь, чоршанба куни Остона форматидаги 20-йиғилишда сўзга чиқиб, уни охиргиси деб эълон қилишни расман таклиф қилди, чунки Тумишевнинг айтишича, “Остона жараёни ўз вазифасини шараф билан бажарган”.
Тумишев Суриянинг “минтақадаги изоляциядан босқичма-босқич чиқиб, араб оиласига қайтиши”ни, яъни 2023 йилнинг май ойида Суриянинг Араб Давлатлари Лигасига қайта аъзо бўлганини музокараларни якунлаш белгиси, деб атади.
Ўз навбатида, Россия президентининг Сурия бўйича махсус вакили Александр Лаврентиев Остона формати ишлашда давом этишини, бироқ янги платформа излашини айтди.
“Агар Қозоғистоннинг қарори, уларнинг фикрича, ҳозир, мақбулроқ жойга кўчириш бўлса, биз маслаҳатлашиб, бошқа жойни танлаймиз”, — деди Лаврентиев.
Унга кўра, Остона форматидаги навбатдаги учрашув 2023 йилнинг иккинчи ярмида бўлиб ўтади, лекин Қозоғистон ҳудудида эмас. “Бу Москва, Теҳрон, Анқара, Дамашқ бўлиши мумкин”, — деди Путиннинг махсус вакили. Шу билан бирга, у Қозоғистоннинг Остона форматини бошқа жойга кўчириш таклифи ўзи учун кутилмаган ҳол бўлганини тан олди.
Изоҳ (0)