Ijtimoiy tarmoqda o‘zini namanganlik tadbirkor Yusupov Shavkat deb tanishtirgan shaxs sud qarorlaridan noroziligini bildirib, prezidentga murojaat yo‘llagani aks etgan video tarqaldi. Oliy sud axborot xizmati holatga munosabat bildirdi.
Fuqaro videomurojaatida 4 yildan buyon auksionda yutib olgan mulkini ololmayotganini aytib, prezidentdan uni qabul qilishini so‘ragan.
“Men sizning qonunlaringizga ishonib, onlayn auksiondan 350 million so‘mga mulk sotib olib, 4 yildan buyon sarson-sargardon bo‘lib yuribman. Na pulimni ololaman, na mulkimni ololaman. Necha marta sudlashgan bo‘lsam, adolat qaror topgani yo‘q. Qonun bo‘yicha, hujjatlar bo‘yicha adolat men tomonda, men haqman, lekin sudlarimiz mening haqligimni tan olayotgani yo‘q.
2023-yil 12-aprel kuni Oliy sud raisi Baxtiyor Islomovning oldiga kirdim. 10 nafar murojaatchining muammosidan faqat meniki hal bo‘lmadi. Qabuliga kirgan paytimda Baxtiyor Islomov adolat qaror topadi, ishni nazoratimga olaman, deb va’da bergandi. Lekin ishim o‘rganilgani yo‘q, ustiga zarurat tug‘ilmagani sababli qaytarildi, deb yozib qaytarib yuborishdi. Sizdan iltimos, meni qabul qilishingizni so‘rayman, adolat qaror topsin”, — deydi u murojaatida.
Oliy sud ushbu holat yuzasidan munosabat bildirishicha, Yusupov Shavkat joriy yil 21-iyun kuni Oliy sud raisining o‘rinbosari qabulida bo‘lib, sud qarorlaridan noroziligiga oid o‘z vajlarini bayon qilgan.
“Qabul chog‘ida murojaatchiga o‘tkazib yuborilgan muddatni tiklash to‘g‘risidagi ariza bilan murojaat qilish huquqi mavjudligi tushuntirildi. U shunday ariza bilan murojaat qilgan taqdirda quyi sudlar chiqargan qarorlar Oliy sudda belgilangan tartibda o‘rganilishi va ularning qonuniyligiga huquqiy baho berilishi ma’lum qilinadi”, — deyiladi xabarda.
Izoh (1)
Daryo.uz internet gazetasimi, internat pul ishlovchisimi, õzlaringni kim yoki nima sifatida kõrsizlar bilmadimku, lekin õzlaringizga yaxshiroq, õqigan, ona-tili,dan dars odamlarni ishga olinglar