Xalq deputatlari Toshkent shahar kengashi 20-iyun kuni “Toshkent shahar mahalliy budjetining 2023-yildagi qo‘shimcha manbalarini xarajatlarga yo‘naltirish to‘g‘risida”gi qarorni qabul qildi. Hujjat matni “E-qaror” yagona elektron tizimiga joylashtirildi.
Qarorda yozilishicha, Toshkent shahar mahalliy budjetining 2023-yil davomida shakllangan qo‘shimcha manbalari hisobidan bir nechta sohaga mablag‘ ajratiladi. Xususan, 6–9-may kunlari Sirdaryo viloyatida o‘tkazilgan III Xalqaro baxshichilik san’ati festivalida Toshkent shahri nomidan qatnashgan jami 35 nafar ijodiy jamoa a’zolari ishtiroki uchun va festivalni o‘tkazish bilan bog‘liq xarajatlarga smetaga muvofiq 475 million 200 ming so‘m beriladi.
Toshkent shahrining qadimiy 12 ta darvozasini tarixiy ko‘rinishlari asosida bosqichma-bosqich qayta tiklash hamda darvozalarga olib boruvchi yo‘l va boshqa infratuzilmalarni yaxshilash, malakali ekspert va olimlarni jalb qilgan holda darvozalarni tiklash bo‘yicha loyiha va loyihaoldi ishlari uchun 638 million 480 ming so‘m ajratiladi.
Shuningdek, mablag‘lar hisobidan Toshkent metropolitenidagi 12 ta bekatda (“O‘zbekiston” yo‘nalishining 7 ta hamda “Yunusobod” yo‘nalishining 5 ta) kirish-chiqish va o‘tish yo‘llarini zamonaviy videokuzatuv moslamalari bilan jihozlash uchun 1,8 milliard so‘m ajratiladi.
Bundan tashqari, qo‘shimcha manbalar hisobidan Toshkent shahar Chavandozlar maktabiga 10 bosh ot va sport anjomlari, texnik jihozlar xarid qilinadi. Obodonlashtirish boshqarmasiga yo‘llarni ta’mirlash ishlarida zarur bo‘lgan maxsus texnika va mexanizmlarni xarid qilish uchun 5 milliard 641 million 200 ming so‘m ajratiladi.
Izoh (0)