Sirdaryoda bedarak yo‘qolgan homilador ayol Toshkentdan topildi

Sirdaryo IIB bedarak yo‘qolgan 26 yoshli homilador ayol qidirilayotganini e’lon qilgan edi. Boshqarma axborot xizmati ayol topilganini ma’lum qildi.

Unga ko‘ra, Sardoba tumani, “Otayurt” mahallasida yashovchi ayol Sarvara Qarshiboyeva (1996-yilda tug‘ilgan) 10-iyun kuni yashash xonadonidan noma’lum tomonga ketib, bedarak yo‘qolgan. Olib borilgan tezkor qidiruv tadbirlari davomida Toshkent shahridan topilib, yaqinlariga sog‘-salomat topshirildi. 

Ayolning topilishida ko‘maklashgan fuqarolar 10 million so‘m bilan mukofotlanishi va’da qilingan edi.  

“Qidiruvda ko‘mak bergan, befarq bo‘lmagan barcha fuqarolarimizga Sirdaryo viloyati IIB jamoasi nomidan o‘z minnatdorchiligimizni bildiramiz”, — deyiladi IIB xabarida.