Тадбиркор суд қароридан норози, у президентга мурожаат йўллади 

Ижтимоий тармоқда ўзини наманганлик тадбиркор Юсупов Шавкат деб таништирган шахс суд қарорларидан норозилигини билдириб, президентга мурожаат йўллагани акс этган видео тарқалди. Олий суд ахборот хизмати ҳолатга муносабат билдирди.

Фуқаро видеомурожаатида 4 йилдан буён аукционда ютиб олган мулкини ололмаётганини айтиб, президентдан уни қабул қилишини сўраган.

“Мен сизнинг қонунларингизга ишониб, онлайн аукциондан 350 миллион сўмга мулк сотиб олиб, 4 йилдан буён сарсон-саргардон бўлиб юрибман. На пулимни ололаман, на мулкимни ололаман. Неча марта судлашган бўлсам, адолат қарор топгани йўқ. Қонун бўйича, ҳужжатлар бўйича адолат мен томонда, мен ҳақман, лекин судларимиз менинг ҳақлигимни тан олаётгани йўқ. 

2023 йил 12 апрель куни Олий суд раиси Бахтиёр Исломовнинг олдига кирдим. 10 нафар мурожаатчининг муаммосидан фақат меники ҳал бўлмади. Қабулига кирган пайтимда Бахтиёр Исломов адолат қарор топади, ишни назоратимга оламан, деб ваъда берганди. Лекин ишим ўрганилгани йўқ, устига зарурат туғилмагани сабабли қайтарилди, деб ёзиб қайтариб юборишди. Сиздан илтимос, мени қабул қилишингизни сўрайман, адолат қарор топсин”, — дейди у мурожаатида.

Олий суд ушбу ҳолат юзасидан муносабат билдиришича, Юсупов Шавкат жорий йил 21 июнь куни Олий суд раисининг ўринбосари қабулида бўлиб, суд қарорларидан норозилигига оид ўз важларини баён қилган.

“Қабул чоғида мурожаатчига ўтказиб юборилган муддатни тиклаш тўғрисидаги ариза билан мурожаат қилиш ҳуқуқи мавжудлиги тушунтирилди. У шундай ариза билан мурожаат қилган тақдирда қуйи судлар чиқарган қарорлар Олий судда белгиланган тартибда ўрганилиши ва уларнинг қонунийлигига ҳуқуқий баҳо берилиши маълум қилинади”, — дейилади хабарда.