“Osmondan uzun belgi ko‘rindi, kimdir yiqildi. Keyin bilsak, jiyanimni yashin urgan ekan”. Paxtaobodda 17 yoshli yigitning o‘limi haqida

Andijon viloyatining Paxtaobod tumanida 19-iyun kuni fermer xo‘jaligiga qarashli dala maydonida ishlayotgan ikki kishini chaqmoq urgani, bir kishi vafot etgani xabar qilingandi. Bosh prokuratura axborot xizmati rahbari Hayot Shamsutdinovning holat yuzasidan qo‘shimcha qilishicha, vaziyat yuzasidan prokuratura tomonidan tergovga qadar tekshiruv harakatlari olib borilmoqda. “Daryo” muxbiri mazkur voqeani o‘rganish maqsadida Paxtaobod tumanida bo‘ldi.

Chaqmoq chaqishidan jabrlangan 15 yoshli qizning otasi Abdurasul Qodirovning aytishicha, o‘sha kuni u turmush o‘rtog‘i va qizi bilan birgalikda paxta chopiqqa chiqqan.

“Qizim uch yildan beri fermer dalasida ishlaydi. Men ham sog‘lig‘im yaxshi bo‘lgan paytda ayolim bilan tirikchilik qilib, o‘sha dalalarda ketmon chopaman. Tirikchiligimiz shu. Har yili fermerlardan yer olib, bahordan kuzgacha ishlaymiz. O‘sha kuni doimgidek ish vaqtida, taxminan 06:30—07:00 lar atrofida qizim va onasi bizga ajratilgan yerni chopish uchun uydan chiqib ketishgandi. O‘lgan bolaning onasi va ayolim bir-biriga qarashib, ishlayotgan bo‘lgan. Chaqmoq chaqib, qizim va o‘sha bolani urgach, xotinim baqirgan. Unga ham ozgina teggan, shekilli, uchib ketgan. O‘ziga kelib, o‘rnidan turib, hammani yordamga chaqirgan. Atrofdagi yong‘oq va sholi ekayotganlarning hammasi yugurib kelib, yordam bergan. Bolaning yaqinlari uni tez yordamga olib kelgunga qadar uning joni uzilib bo‘lgan ekan. Qizimni birozdan keyin ayasi va boshqalar olib kelishdi. Qizimning yoniga borganimda uning holati yomon edi. Bir kun tumandagi shifoxonada yotdi, keyin viloyat shifoxonasiga o‘tkazishdi”, — deydi qizning otasi Abdurasul Qodirov.

Chaqmoq urishi oqibatida vafot etgan Baxtiyor Sohibjonovning kelinoyisi Feruza Yo‘ldoshevaning aytishicha, u o‘sha kuni voqea yuz bergan joydan sal uzoqroqda bo‘lgan.

“Ular sal uzoqroqda edi. Dalada ish qilayotgandik. Ularga yaqinlashganimda osmondan charsillagan uzun belgi tushdi, kimdir yiqildi. Uzoqroqda bo‘lganim uchun kimligini bilmay qoldim. Keyin bilsak, o‘zimning jiyanim ekan. Jiyan vafot etdi”, — deydi Feruza Yo‘ldosheva.

Yigit va qizni yashin urgan paytda voqea joyida uchinchi shaxs ham bo‘lgan.

Chaqmoq urishidan jarohat olgan qizning onasi Nargiza Ismonovaning aytishicha, havo o‘zgargach bolalariga ketmonni tashlang, degan va qaytishga taraddudlangan. Biroq qisqa muddat ichida yuz bergan chaqmoq yigit va qizni ikki tomonga uloqtirgan.

“10—15 yildan buyon shu ‘Do‘stlik’ fermer xo‘jaligida ishlayman. Tirikchiligimiz asosan shu. Ikki-uch yildan beri ikkita fermer xo‘jaligidan rizqimizni teramiz. Bu yil bitta fermerdan bir, ikkinchisidan 2,5 gektar yer olganmiz. 19-iyun kuni ertalab soat 06:00—07:00 atrofida bitta Damas’da uchalamiz dalaga keldik. Ozgina ish qilganimizdan keyin soat 08:00 da havo o‘zgarib, to‘palon bo‘ldi. Momaqaldiroq gumburladi. Shundan keyin bolalarga ketmonni tashlashlari kerakligini aytib, ketamiz, dedim. Oradan besh daqiqa ham o‘tmadi, birdaniga ikkinchi chaqmoq tushdimi, bilmayman, orqamga qarasam ikkovi ikki tomonda yotgan ekan. Baqirib, atrofdagilardan yordam so‘radim. Ovozimni eshitganlar kelib yordam qilishdi. O‘sha yerda bir necha marotaba tez yordamga telefon qildik, biroq ko‘tarishmadi. Aytishlaricha, tez yordam telefonlari Andijon viloyati markaziga ulangani uchun tusholmaganmiz. Natijada o‘z vaqtida birinchi yordam ko‘rsatilmadi. Shu bois qo‘shnimizning o‘g‘li vafot etdi. U oilada yagona o‘g‘il edi. Bolani olib borgach, orqasidan biz ham bordik. Borganimizdan keyin bizni Paxtaobodga olib ketishdi. Ertasiga viloyat shoshilinchga olib kelishdi. Bu ham bir sinov ekan-da”, — deydi Nargiza Ismonova.

Paxtaobod tuman tez tibbiy yordam bo‘limi Madaniyat shoxobchasi navbatchi shifokori G‘ulomjon Salohiddinovning aytishicha, soat 08:00 lar atrofida shoxobchaga ikki nafar bemor olib kelingan bo‘lib, ularning bir nafarida olib kelingunga qadar biologik o‘lim sodir bo‘lgan.

“19-iyun kuni ertalab soat 08:00 larda navbatchilikni qabul qilish uchun bordim. Formamni almashtirayotganimda bir yigitni olib kelishdi. Behush holatda ekan. Ichkariga olib kirishgach, sherigim yordam ko‘rsata boshladi. Chiqib ko‘rsam, yigitda hayotiy muhim belgilar yo‘q, biologik o‘lim sodir bo‘lgan ekan. Keyin bilsak, yashin urgan ekan. Oradan hech qancha vaqt o‘tmasdan bir qizni olib kelishdi. U ham sal avvalroq olib kelingan o‘sha bola bilan birga dalada bo‘lgan ekan. Ust-boshlari kuyib ketgan, terisidayam ancha kuyishlari bor edi. Unga ham kerakli birinchi yordamni ko‘rsatdik. Hamkasblarimizning aytishicha, hozirda qizning holati yaxshi”, — deydi navbatchi shifokor G‘ulomjon Salohiddinov.

Viloyat sog‘liqni saqlash boshqarmasi axborot xizmatining maʼlumot berishicha, chaqmoq urishi natijasida jarohat olgan qiz 20-iyun kuni Paxtaobod tuman shifoxonasidan Andijon shahridagi Respublika tez tibbiy yordam ilmiy markazi viloyat filialiga yotqizilgan. Bemorning ahvoli o‘rta og‘ir holatda bo‘lib, davo muolajalarini olmoqda.