“Осмондан узун белги кўринди, кимдир йиқилди. Кейин билсак, жиянимни яшин урган экан”. Пахтаободда 17 ёшли йигитнинг ўлими ҳақида

Андижон вилоятининг Пахтаобод туманида 19 июнь куни фермер хўжалигига қарашли дала майдонида ишлаётган икки кишини чақмоқ ургани, бир киши вафот этгани хабар қилинганди. Бош прокуратура ахборот хизмати раҳбари Ҳаёт Шамсутдиновнинг ҳолат юзасидан қўшимча қилишича, вазият юзасидан прокуратура томонидан терговга қадар текширув ҳаракатлари олиб борилмоқда. “Дарё” мухбири мазкур воқеани ўрганиш мақсадида Пахтаобод туманида бўлди.

Чақмоқ чақишидан жабрланган 15 ёшли қизнинг отаси Абдурасул Қодировнинг айтишича, ўша куни у турмуш ўртоғи ва қизи билан биргаликда пахта чопиққа чиққан.

“Қизим уч йилдан бери фермер даласида ишлайди. Мен ҳам соғлиғим яхши бўлган пайтда аёлим билан тирикчилик қилиб, ўша далаларда кетмон чопаман. Тирикчилигимиз шу. Ҳар йили фермерлардан ер олиб, баҳордан кузгача ишлаймиз. Ўша куни доимгидек иш вақтида, тахминан 06:30—07:00 лар атрофида қизим ва онаси бизга ажратилган ерни чопиш учун уйдан чиқиб кетишганди. Ўлган боланинг онаси ва аёлим бир-бирига қарашиб, ишлаётган бўлган. Чақмоқ чақиб, қизим ва ўша болани ургач, хотиним бақирган. Унга ҳам озгина тегган, шекилли, учиб кетган. Ўзига келиб, ўрнидан туриб, ҳаммани ёрдамга чақирган. Атрофдаги ёнғоқ ва шоли экаётганларнинг ҳаммаси югуриб келиб, ёрдам берган. Боланинг яқинлари уни тез ёрдамга олиб келгунга қадар унинг жони узилиб бўлган экан. Қизимни бир оздан кейин аяси ва бошқалар олиб келишди. Қизимнинг ёнига борганимда унинг ҳолати ёмон эди. Бир кун тумандаги шифохонада ётди, кейин вилоят шифохонасига ўтказишди”, — дейди қизнинг отаси Абдурасул Қодиров.

Чақмоқ уриши оқибатида вафот этган Бахтиёр Соҳибжоновнинг келинойиси Феруза Йўлдошеванинг айтишича, у ўша куни воқеа юз берган жойдан сал узоқроқда бўлган.

“Улар сал узоқроқда эди. Далада иш қилаётгандик. Уларга яқинлашганимда осмондан чарсиллаган узун белги тушди, кимдир йиқилди. Узоқроқда бўлганим учун кимлигини билмай қолдим. Кейин билсак, ўзимнинг жияним экан. Жиян вафот этди”, — дейди Феруза Йўлдошева.

Йигит ва қизни яшин урган пайтда воқеа жойида учинчи шахс ҳам бўлган.

Чақмоқ уришидан жароҳат олган қизнинг онаси Наргиза Исмонованинг айтишича, ҳаво ўзгаргач болаларига кетмонни ташланг, деган ва қайтишга тараддудланган. Бироқ қисқа муддат ичида юз берган чақмоқ йигит ва қизни икки томонга улоқтирган.

“10—15 йилдан буён шу ‘Дўстлик’ фермер хўжалигида ишлайман. Тирикчилигимиз асосан шу. Икки-уч йилдан бери иккита фермер хўжалигидан ризқимизни терамиз. Бу йил битта фермердан бир, иккинчисидан 2,5 гектар ер олганмиз. 19 июнь куни эрталаб соат 06:00—07:00 атрофида битта Damas’да учаламиз далага келдик. Озгина иш қилганимиздан кейин соат 08:00 да ҳаво ўзгариб, тўпалон бўлди. Момақалдироқ гумбурлади. Шундан кейин болаларга кетмонни ташлашлари кераклигини айтиб, кетамиз, дедим. Орадан беш дақиқа ҳам ўтмади, бирданига иккинчи чақмоқ тушдими, билмайман, орқамга қарасам иккови икки томонда ётган экан. Бақириб, атрофдагилардан ёрдам сўрадим. Овозимни эшитганлар келиб ёрдам қилишди. Ўша ерда бир неча маротаба тез ёрдамга телефон қилдик, бироқ кўтаришмади. Айтишларича, тез ёрдам телефонлари Андижон вилояти марказига улангани учун тушолмаганмиз. Натижада ўз вақтида биринчи ёрдам кўрсатилмади. Шу боис қўшнимизнинг ўғли вафот этди. У оилада ягона ўғил эди. Болани олиб боргач, орқасидан биз ҳам бордик. Борганимиздан кейин бизни Пахтаободга олиб кетишди. Эртасига вилоят шошилинчга олиб келишди. Бу ҳам бир синов экан-да”, — дейди Наргиза Исмонова.

Пахтаобод туман тез тиббий ёрдам бўлими Маданият шохобчаси навбатчи шифокори Ғуломжон Салоҳиддиновнинг айтишича, соат 08:00 лар атрофида шохобчага икки нафар бемор олиб келинган бўлиб, уларнинг бир нафарида олиб келингунга қадар биологик ўлим содир бўлган.

“19 июнь куни эрталаб соат 08:00 ларда навбатчиликни қабул қилиш учун бордим. Формамни алмаштираётганимда бир йигитни олиб келишди. Беҳуш ҳолатда экан. Ичкарига олиб киришгач, шеригим ёрдам кўрсата бошлади. Чиқиб кўрсам, йигитда ҳаётий муҳим белгилар йўқ, биологик ўлим содир бўлган экан. Кейин билсак, яшин урган экан. Орадан ҳеч қанча вақт ўтмасдан бир қизни олиб келишди. У ҳам сал аввалроқ олиб келинган ўша бола билан бирга далада бўлган экан. Уст-бошлари куйиб кетган, терисидаям анча куйишлари бор эди. Унга ҳам керакли биринчи ёрдамни кўрсатдик. Ҳамкасбларимизнинг айтишича, ҳозирда қизнинг ҳолати яхши”, — дейди навбатчи шифокор Ғуломжон Салоҳиддинов.

Вилоят соғлиқни сақлаш бошқармаси ахборот хизматининг маълумот беришича, чақмоқ уриши натижасида жароҳат олган қиз 20 июнь куни Пахтаобод туман шифохонасидан Андижон шаҳридаги Республика тез тиббий ёрдам илмий маркази вилоят филиалига ётқизилган. Беморнинг аҳволи ўрта оғир ҳолатда бўлиб, даво муолажаларини олмоқда.