Atlantika okeanida “Titanik” halokatga uchragan joyga sayohat qilib g‘oyib bo‘lgan suvosti kemasi topilgani haqida xabar berilgandi. Ammo kema hanuz qidirilayotgani ma’lum bo‘ldi. Daily Mail nashrining yozishicha, ushbu kema birorta tartibga soluvchi organ tomonidan sertifikatlanmagan.
“Titanik” halokatga uchragan joyni ko‘rish uchun sayyohlar OceanGate Expeditions kompaniyasining kemasida qariyb 3 900 metr pastga tushadi, ular safar uchun 250 ming dollardan to‘laydi.
OceanGate Expeditions kompaniyasi 2009-yilda tashkil etilgan va u o‘nlab yillardan beri tadqiqotchi va sayyohlarni dengiz tubiga olib tushish bilan shug‘ullanadi. Ammo suvosti kemasiga chiqishdan avval sayohatchilar “Ushbu eksperimental kema hech qanday tartibga soluvchi organ tomonidan tasdiqlanmagan yoki sertifikatlanmagan. Safar davomida jismoniy shikastlanish, ruhiy jarohat yoki o‘limga olib keladigan holatlar bo‘lishi mumkin” degan shartnomani imzolashi kerak.
CBS News Sunday muxbiri Devid Pog, 2022-yilda OceanGate ekspeditsiyasida ishtirok etgan va o‘z tajribalari haqida gapirib bergan.
“Ushbu suvosti kemasi hayratlanarli darajada oddiy. U qo‘lboladek tuyuladi. Uni boshqarish video o‘yin pulti bilan amalga oshiriladi”, — dedi u.
Pogning aytishicha, ekspeditsiyalar nihoyatda xavfli edi. Suvosti kemasi uglerod tolasi va titandan yasalgan bo‘lib, dengiz ostidagi kuchli bosimga chidashga mo‘ljallangan. U “ona kema” bilan matnli xabarlar orqali aloqada bo‘ladi.
“Titanik” vayronalariga yetib borish uchun odatda ikki yarim soat vaqt ketadi. Har bir ekspeditsiya sakkiz kun davom etadi.
Yo‘qolgan kema bortida besh kishi, jumladan, Stokton Rash kompaniyasining bosh direktori va asoschisi, suvosti kemalari qo‘mondoni Pol-Anri Nargolet hamda Action Aviation samolyotlarini sotish va ekspluatatsiya qiluvchi kompaniya egasi britaniyalik milliarder Xemish Xarding bor edi.
Britaniyaning “Titanik” kemasi o‘z vaqtida dunyodagi eng ulkan kema hisoblanib, u 1912-yilning 14-aprelidan 15-apreliga o‘tar kechasi Atlantika okeanida aysbergga urilib, cho‘kib ketgan. Oqibatda kema bortida bo‘lgan odamlarning 1 513 nafari halok bo‘lgan, 711 nafar inson qutqarib qolingan.
Izoh (0)