Москва вилоятининг Химки шаҳар суди 2019 йилда Шереметево аэропортига фавқулодда қўниш чоғида ёниб кетган Sukhoi Superjet 100 самолёти учувчи-командири Денис Евдокимовни олти йилга колонияга ҳукм қилди, деб ёзади “ТАСС”.
Суд Евдокимовни икки ёки ундан ортиқ кишининг ўлимига сабаб бўлган йўл ҳаракати хавфсизлиги қоидаларини бузиш моддаси бўйича айбдор деб топди. Учувчига айнан прокуратура талаб қилган жазо берилди.
Прокуратура маълумотларига кўра, Евдокимов бошқарган самолёт етарлича мувозанатга эга бўлмаган, қўниш жараёни ҳаддан ташқари юкланиш билан амалга оширилган, авиакема командири “фавқулодда вазиятни ҳис қилмаган ва фавқулодда ҳолат кодини ўрнатмаган”.
2019 йилнинг 5 май куни Москвадан Мурманскка учаётган Аэрофлот Sukhoi Superjet 100 самолёти Шереметевога фавқулодда қўнган эди. Самолёт қўнаётганда ёниб кетган. Бортдаги 78 кишидан 41 нафари ҳалок бўлган.
Октябрь ойида Россия Тергов қўмитаси Денис Евдокимовни эҳтиётсизлик оқибатида икки ёки ундан ортиқ одамнинг ўлимига сабаб бўлган ҳаво ҳаракати қоидаларини бузганликда айблади.
Евдокимов айбини тан олишдан бош тортди. Унинг таъкидлашича, самолёт корпуси ёнғинга узоқ вақт бардош бера оларди, аммо кимдир орқа эшикни очгани сабабли ҳаво оқими уриб, олов тезда салонга тарқалган. Ҳодисада йўловчилар олд эшиклардан эвакуация қилинган.
Изоҳ (0)