Хитой ҳукумати қарияларга ғамхўрлик қилиш ҳамда тиббий ва ижтимоий соҳа ходимларининг етишмаслиги муаммосини миллионлаб роботлар ишлаб чиқариш билан ҳал қилмоқчи. Бу ҳақда Sixth Tone хабар берди.
Хитой миллий стандартларига кўра, қарияларни парваришлаш муассасаларида ҳар тўрт кишига бир нафар қаровчи бўлиши керак. Аммо ҳозирда қариялар уйларининг 8,1 миллион аҳолисига атиги 320 минг киши хизмат кўрсатмоқда.
Хитойда янги технологиялар ушбу оғир вазиятни ҳал қилишга ёрдам беради, деб умид қилинмоқда. Хитойнинг IT гигантлари аллақачон сунъий интеллектга эга роботлар яратишга киришган. Қарияларга ҳамроҳлик қиладиган роботлар қўшиқ куйлаш, мулоқот қилиш, реабилитацияда қатнашиш ва кино намойиш қилиш қобилиятларига эга бўлади.
Шунингдек, Хитой ҳукумати қариялар орасида ақлли технологияларни ёйишни рағбатлантирмоқда. Буларга саломатликни кузатувчи ва дори-дармонларни қабул қилиш ҳақида эслатиб турувчи соатлар, шунингдек, шифокор чақириш, об-ҳаво прогнози ва ўйинларга кириш учун ишлатиладиган ақлли планшетлар киради.
Таҳлилчиларнинг прогнозларига кўра, Хитой ҳукумати маблағ ажратишни ошириш, янги маҳсулотларни ишлаб чиқиш ва истеъмол моделларини ўзгартириш натижасида кейинги ўн йил ичида ижтимоий технологиялар бозорида ҳаммадан ўзиб кетади.
- 2022 йилда Хитой аҳолиси 1959—1961 йиллардаги йирик очарчиликдан кейин 60 йил ичида биринчи марта камайди. Аҳолининг қарийб 15 фоизи (209,78 миллион) 65 ёшдан ошган фуқаролардир. Меҳнатга лаёқатли ёшдагилар (16 ёшдан 59 ёшгача) 875,56 миллион кишини ташкил этди, бу умумий кўрсаткичнинг қарийб 62 фоизига тенг.
Изоҳ (0)