Британиянинг машҳур Daily Mail таблоиди биринчи саҳифасида: “Эртагаёқ: Бизнинг янги билимдон колумнистимизни Вестминстер ва бутун дунё бўйлаб ўқишингиз мумкин” сарлавҳаси билан чиқди.
Газета унинг исмини ошкор қилмаган, бироқ Британия ОАВга кўра, сарлавҳа ёнидаги силуэт Буюк Британиянинг собиқ бош вазири Борис Жонсонни англатади.
Politico ўз манбаларига таяниб ёзишича, газета жаноб Жонсонга “олти рақамдан иборат жуда юқори сумма” тўламоқчи.
Шу ҳафта бошида Буюк Британия Жамоатчилик палатасининг Имтиёзлар қўмитаси жаноб Жонсонга оид тергов натижаларини тақдим этди. Қўмита Борис Жонсон пандемия пайтидаги зиёфат можароси билан боғлиқ ҳолатни текшириш жараёнида Британия собиқ Бош вазири “парламентни атайлаб чалғитишга уринган” деган хулосага келди.
Аввалроқ, Борис Жонсон Британия парламенти депутатлигидан кетишини маълум қилганди. Бунга сабаб қилиб у Жамоатчилик палатаси қўмитасининг пандемия пайтидаги зиёфат билан боғлиқ ҳолат бўйича тайёрлаган ҳисоботини кўрсатган.
“Улар ҳанузгача қасддан Жамоатчилик палатасини чалғитганим ҳақида ҳеч қандай далил келтирмадилар”, — деганди ўшанда Жонсон.
Изоҳ (0)