Parijda 12 qavatdan yuqori, ya’ni taxminan 37 metrdan baland uylarni qurishga yana taqiq qo‘yildi. Baland piramida shaklidagi Tour Triangle minorasining qurilish rejasi jamoatchilik noroziligiga sabab bo‘ldi, deb xabar bermoqda Euronews.
Osmono‘par Eyfel minorasi borligiga qaramay, Parij baland binolari kam shaharga aylanib qolmoqda. Iyun oyida Fransiya poytaxtida “Mahalliy urbanizatsiya rejasi” qabul qilindi. Faollarning fikricha, bu reja ekologiyani asrashga xizmat qiladi.
Parij shahar kengashi yangi binolarni 12 qavatdan (37 metr) ko‘p bo‘lmagan darajada cheklashni yoqlab ovoz berganidan keyin reja kuchga kirdi.
Parijning biznes tumani Defansda bir nechta osmono‘par binolar mavjud, 13 va 15-okruglarida es klassik binolarga qaraganda ko‘proq baland binolar bor. Lekin shahar markazidagi binolar ancha past.
1973-yilda qurib bitkazilgan 209 metrli Monparnas minorasi odamlarning tanqidiga sabab bo‘lgandi. Keyinchalik, 1977-yilda shaharlarda 37 metrdan baland uylar qurish taqiqlandi. Bu cheklov 2010-yilgacha, shaharning sobiq meri Bertran Delanoe Parijda 180 metrlik ofislar va 50 metrlik turar joy binolarini qurishga ruxsat berguniga qadar amalda bo‘ldi.
Hozirgi taqiq mer Ann Idalgoning karbonat angidrid chiqindilarini kamaytirish dasturining bir qismi. Ushbu qarorning yana bir sababi — munozarali piramida shaklidagi Tour Triangle minorasi bo‘ldi. Uning qurilish 2021-yilda boshlanib, 2026-yilda yakunlanishi kerak edi.
Biroq turli yuridik va loyihalashtirishga oid bahslar tufayli qurilish 12 yilga kechiktirildi. Qurilish tugallangach, Tour Triangle shahardagi uchinchi eng baland bino bo‘ladi. Unda mehmonxona va ofislar, do‘kon va restoranlar joylashadi.
Izoh (0)