Парижда 12 қаватдан юқори, яъни тахминан 37 метрдан баланд уйларни қуришга яна тақиқ қўйилди. Баланд пирамида шаклидаги Tour Triangle минорасининг қурилиш режаси жамоатчилик норозилигига сабаб бўлди, деб хабар бермоқда Euronews.
Осмонўпар Эйфель минораси борлигига қарамай, Париж баланд бинолари кам шаҳарга айланиб қолмоқда. Июнь ойида Франция пойтахтида “Маҳаллий урбанизация режаси” қабул қилинди. Фаолларнинг фикрича, бу режа экологияни асрашга хизмат қилади.
Париж шаҳар кенгаши янги биноларни 12 қаватдан (37 метр) кўп бўлмаган даражада чеклашни ёқлаб овоз берганидан кейин режа кучга кирди.
Парижнинг бизнес тумани Дефансда бир нечта осмонўпар бинолар мавжуд, 13 ва 15-округларида эс классик биноларга қараганда кўпроқ баланд бинолар бор. Лекин шаҳар марказидаги бинолар анча паст.
1973 йилда қуриб битказилган 209 метрли Monparnas минораси одамларнинг танқидига сабаб бўлганди. Кейинчалик, 1977 йилда шаҳарларда 37 метрдан баланд уйлар қуриш тақиқланди. Бу чеклов 2010 йилгача, шаҳарнинг собиқ мери Бертран Деланоэ Парижда 180 метрлик офислар ва 50 метрлик турар жой биноларини қуришга рухсат бергунига қадар амалда бўлди.
Ҳозирги тақиқ мэр Анн Идалгонинг карбонат ангидрид чиқиндиларини камайтириш дастурининг бир қисми. Ушбу қарорнинг яна бир сабаби — мунозарали пирамида шаклидаги Tour Triangle минораси бўлди. Унинг қурилиш 2021 йилда бошланиб, 2026 йилда якунланиши керак эди.
Бироқ турли юридик ва лойиҳалаштиришга оид баҳслар туфайли қурилиш 12 йилга кечиктирилди. Қурилиш тугаллангач, Tour Triangle шаҳардаги учинчи энг баланд бино бўлади. Унда меҳмонхона ва офислар, дўкон ва ресторанлар жойлашади.
Изоҳ (0)