Коррупцияга қарши курашиш агентлиги давлат органлари ва ташкилотлари фаолиятининг очиқлиги юзасидан 2023 йил биринчи чорак якунлари бўйича хулосасини эълон қилди. Бу ҳақда агентлик матбуот хизмати “Дарё”га маълум қилди.
Унда айтилишича, ўрганиш давомида давлат органлари ва ташкилотларида очиқлик бўйича амалга оширилаётган ишларнинг самарадорлиги ва натижадорлигини баҳолашга қаратилган Очиқлик индексида фаолияти “қизил” тоифада баҳоланган 27 та давлат органлари ва ташкилотларига алоҳида эътибор қаратилган.
“Ўрганиш натижаларига кўра, Жиззах, Сирдарё ва Андижон вилоятлари ҳокимликларига, шунингдек, Маданият ва туризм вазирлиги ҳузуридаги Кинематография агентлиги, “Алоқабанк” АТБ, “Ўзавтосаноат” АЖларга очиқликни таъминлаш соҳасида йўл қўйилган камчиликларни бартараф этиш ҳамда хизмат вазифаларига масъулиятсизлик билан ёндашган мансабдор шахсларга нисбатан тегишли интизомий жазо чорасини қўллаш тўғрисида тақдимнома киритилди”, — дейилади агентлик ахборотида.
Шунингдек, давлат ҳокимияти ва бошқаруви органлари фаолиятининг очиқлиги тўғрисидаги қонунчиликни бузганлик учун Санитария-эпидемиологик осойишталик ва жамоат саломатлиги хизмати мансабдор шахсига нисбатан Маъмурий жавобгарлик тўғрисидаги кодекснинг 215 прим 7-моддаси (давлат ҳокимияти ва бошқаруви органлари фаолиятининг очиқлиги тўғрисидаги қонунчиликни бузиш) билан маъмурий баённома расмийлаштирилиб, кўриб чиқиш учун судга юборилган.
Қўшимча қилинишича, мазкур йўналишдаги ўрганишлар бошқа давлат органлари ва ташкилотлари фаолиятида ҳам давом эттирилмоқда.
2022 йил якунлари бўйича эълон қилинган “Очиқлик индекси”да маъмурий баённома тузилмаган, фақат тақдимномалар киритиш билан чекланилган.
Маълумот учун, Маъмурий жавобгарлик тўғрисидаги кодекснинг 215 прим 7-моддаси — Давлат ҳокимияти ва бошқаруви органлари фаолиятининг очиқлиги тўғрисидаги қонунчиликни бузганлик (бундан ушбу кодекснинг 175 прим 7 ва 229-моддаларида назарда тутилган ҳоллар мустасно), жумладан, Очиқ маълумотлар сифатида жойлаштириладиган, ижтимоий аҳамиятга молик бўлган маълумотлар рўйхатига киритилган маълумотларни эълон қилмаганлик ёки тўлиқ эълон қилмаганлик, эълон қилиш муддатларига ва тартибига риоя этмаганлик ёки маълумотларни бузиб кўрсатганлик — мансабдор шахсларга базавий ҳисоблаш миқдорининг уч бараваридан беш бараваригача миқдорда жарима солишга сабаб бўлади.
Худди шундай ҳуқуқбузарлик маъмурий жазо чораси қўлланилганидан кейин бир йил давомида такрор содир этилган бўлса — мансабдор шахсларга базавий ҳисоблаш миқдорининг беш бараваридан ўн бараваригача миқдорда жарима солишга сабаб бўлади.
Изоҳ (0)