Chexiya prezidenti, NATOning sobiq bosh maslahatchisi Pyotr Pavel alyans qo‘shinlari Ukrainaga kiritilmasligini aytib, buning sababini tushuntirdi. Bu haqda UNIAN xabar berdi.
Yevropa Ukrainaga yordam chegaralarini kengaytirayotganini hisobga olib, G‘arb qo‘shinlari Ukrainada bo‘lishi mumkinmi, degan savolga Chexiya prezidenti javob berdi.
“Menimcha, bu masalada hech qanday o‘zgarishlar bo‘lmaydi”, — dedi Pyotr Pavel.
Siyosatchi ittifoq mamlakatlari bunday ssenariyda Rossiya tomonidan yadroviy zarba berish ehtimoli katta, deb hisoblashini ta’kidladi.
“NATO qo‘shinlari operatsiya boshida yoki oxirida qo‘shiladimi, muhim emas. Yuridik jihatdan bu ahamiyat kasb etmaydi. Qaysi mamlakat yoki davlatlar guruhi konfliktga qo‘shilishidan qat’i nazar, bu NATO Rossiyaga qarshi urushga qo‘shilganini anglatadi.
Menimcha, hech kim bunday urushni xohlamaydi, chunki Rossiya armiyasi va hukumatining barcha zaif tomonlarini hisobga olgan holda, bunday ssenariyda Moskva yadro qurolidan foydalanishni xohlashi mumkin. Ular bu haqda bir necha bor gapirgan va shu uchun har bir aqli raso siyosatchi, ehtimol, bunday variantni rad etadi”, — dedi u.
Ukrainaning NATOga intilishi: hozirgacha nimalar ma’lum?
2022-yilda Ukraina Shimoliy Atlantika alyansiga qo‘shilish uchun ariza berdi. Kelgusi oy Vilnyus NATO sammitiga mezbonlik qiladi, Ukraina ushbu uchrashuvda ittifoqqa taklif qilinish va xavfsizlik kafolatlari berilishini kutmoqda.
Ukraina prezidenti devonining xabar berishicha, Ukrainaning a’zoligini allaqachon NATOga a’zo 20 ta davlat (jami 31 ta) qo‘llab-quvvatlamoqda.
Izoh (0)