NATO sobiq bosh kotibi Anders Fog Rasmussen alyansni Ukrainaga yozma xavfsizlik kafolatlarini taqdim etishga va uning hech qanday shartlarsiz NATOga a’zo bo‘lishi uchun yo‘l xaritasini belgilashga chaqirdi. Aks holda, NATOga a’zo ayrim davlatlar Ukrainaga qo‘shin yuborishi mumkin, deb Rasmussenning so‘zlarini keltirdi The Guardian.

Fog Rasmussenning fikricha, xavfsizlik kafolatlari razvedka ma’lumotlarini almashish, Ukraina bilan qo‘shma mashg‘ulotlar, o‘q-dorilar ishlab chiqarishni ko‘paytirish va Rossiyani kelajakdagi ehtimoliy hujumlardan tiyib turish uchun Kiyevga yetarli qurol yetkazib berishni o‘z ichiga olishi kerak. So‘nggi paytlarda bu haqda tez-tez gapirilmoqda, dedi NATO sobiq bosh kotibi Fransiyaning xuddi shunday chaqirig‘ini nazarda tutib.

Shu bilan birga, Fog Rasmussen xavfsizlik kafolatlarining o‘zi yetarli bo‘lmasligini ta’kidladi. “NATO ittifoqchilaridan ayrimlar Ukrainaning a’zolikka intilishi borasidagi muhokamadan qochish uchun xavfsizlik kafolatlarini yoqlab chiqishi mumkin. Ular xavfsizlik kafolatlarini taqdim etish orqali alyansga a’zolik masalasini chetlab o‘tishga umid qilmoqda. Menimcha, bu imkonsiz”, — dedi u. Siyosatchi Sharqiy va Markaziy Yevropa davlatlari, ayniqsa, Ukrainaning NATOga olib boradigan yo‘li muhokamasini talab qilayotganini eslatdi.

Fog Rasmussen Polshaning Ukrainaga yordamini qayd etib, “Agar NATO Ukraina uchun aniq yo‘l masalasida kelisha olmasa, ba’zi davlatlar alohida chora ko‘rishi mumkinligi”dan ogohlantirdi.

“Men bu kontekstda Polsha milliy darajada faolroq harakat qilishini va Boltiqbo‘yi mamlakatlari (Ukrainaga) qo‘shin yuborish imkoniyatini o‘rganayotganini istisno qilmayman”, — dedi NATO sobiq rahbari. Uning so‘zlariga ko‘ra, Ukrainaning bunday harbiy yordam so‘rashi mutlaqo qonuniy bo‘ladi.