Чехия президенти, НАТОнинг собиқ бош маслаҳатчиси Пётр Павел альянс қўшинлари Украинага киритилмаслигини айтиб, бунинг сабабини тушунтирди. Бу ҳақда UNИАН хабар берди.
Европа Украинага ёрдам чегараларини кенгайтираётганини ҳисобга олиб, Ғарб қўшинлари Украинада бўлиши мумкинми, деган саволга Чехия президенти жавоб берди.
“Менимча, бу масалада ҳеч қандай ўзгаришлар бўлмайди”, — деди Пётр Павел.
Сиёсатчи иттифоқ мамлакатлари бундай сценарийда Россия томонидан ядровий зарба бериш эҳтимоли катта, деб ҳисоблашини таъкидлади.
“НАТО қўшинлари операция бошида ёки охирида қўшиладими, муҳим эмас. Юридик жиҳатдан бу аҳамият касб этмайди. Қайси мамлакат ёки давлатлар гуруҳи конфликтга қўшилишидан қатъи назар, бу НАТО Россияга қарши урушга қўшилганини англатади.
Менимча, ҳеч ким бундай урушни хоҳламайди, чунки Россия армияси ва ҳукуматининг барча заиф томонларини ҳисобга олган ҳолда, бундай сценарийда Москва ядро қуролидан фойдаланишни хоҳлаши мумкин. Улар бу ҳақда бир неча бор гапирган ва шу учун ҳар бир ақли расо сиёсатчи, эҳтимол, бундай вариантни рад этади”, — деди у.
Украинанинг НАТОга интилиши: ҳозиргача нималар маълум?
2022 йилда Украина Шимолий Атлантика альянсига қўшилиш учун ариза берди. Келгуси ой Вильнюс НАТО саммитига мезбонлик қилади, Украина ушбу учрашувда иттифоққа таклиф қилиниш ва хавфсизлик кафолатлари берилишини кутмоқда.
Украина президенти девонининг хабар беришича, Украинанинг аъзолигини аллақачон НАТОга аъзо 20 та давлат (жами 31 та) қўллаб-қувватламоқда.
Изоҳ (0)