Quyosh tizimining 5 ta sayyorasi, ya’ni Saturn, Neptun, Yupiter, Uran va Merkuriy 17-iyun kuni bir safda tiziladi. Bu haqda Science Alert xabar berdi.
Ushbu astronomik hodisani ko‘rish uchun osmon juda tiniq bo‘lishi kerak va osmon jismlarini yaxshiroq kuzatish uchun durbin yoki kichik teleskop kerak bo‘ladi. Astronomlar sayyoralar shu tartibda 16-iyunda va 18-iyunda ko‘rinsa ham, aynan 17-iyunda ular tungi osmonda ayniqsa yorqin ko‘rinishini aytmoqda.
Sayyoralarning noyob paradini qanday ko‘rish mumkin?
17-iyun, shanba kuni quyosh chiqishidan taxminan bir soat oldin, sharqqa qarash kerak. 5 sayyoraning eng yorqini bo‘lgan Yupiter ko‘rinadi, uni hatto oddiy ko‘z bilan ham aniqlash oson.
Yupiterdan so‘ng, biroz yuqoriga va o‘ngga qarash kerak. Janubi-sharqda Saturn ko‘rinadi, u Yupiter kabi yorqin va katta bo‘lmaydi.
Shundan so‘ng Merkuriyni qidirish kerak, u Yupiterdan bir oz chap, pastda joylashgan va uni maxsus qurilmalarsiz kuzatish mumkin.
Yerdan eng uzoqda joylashgan sayyoralar — Uran va Neptunni qidirish bilan bog‘liq muammolar paydo bo‘lishi mumkin. Ular juda xira va hatto osmon juda musaffo bo‘lsa ham, ularni ko‘rish uchun durbin yoki teleskop kerak bo‘ladi.
Masalan, Neptunni Yupiter va Saturn orasida, Uranni Merkuriy va Yupiter o‘rtasida qidirish kerak. Barcha 5 sayyora shu tartibda joylashadi: Merkuriy, Uran, Yupiter, Neptun, Saturn.
Keyingi safar sayyoralar paradini 2040-yil 8-sentabrda ko‘rish mumkin.
Izoh (0)