20 yoshli yigit vafot etdi, 2 bemorning ahvoli og‘ir: Toshkentdagi sexda sodir bo‘lgan portlash oqibatlari haqida reportaj (video)

Toshkent shahrining Chilonzor tumanidagi mis quvurlari ishlab chiqaruvchi sexda sodir bo‘lgan portlash oqibatida endigina 20 yoshga to‘lgan Murod ismli yigit vafot etdi. Ikki nafar bemorning ahvoli og‘ir. Bu haqda voqea joyida bo‘lgan “Daryo” muxbiri xabar bermoqda.

Favqulodda vaziyatlar vazirligi bergan dastlabki maʼlumotga ko‘ra, Astrobod ko‘chasida joylashgan mis quvurlari ishlab chiqarish sexining bir qavatli bostirmasi (angar)da havo-gaz aralashmasi chaqnashi sodir bo‘lgan. Dastlabki maʼlumotlarda 6 nafar fuqaro turli darajada tan jarohati olib, Respublika shoshilinch tibbiy yordam ilmiy markaziga yotqizilgani aytilgandi.

Keyinroq hodisa oqibatida bir nafar fuqaro voqea joyida vafot etgani, 16 nafar fuqaro turli darajada tan jarohati olib, shifoxonaga yotqizilgani xabar berildi.

Respublika shoshilinch tibbiy yordam ilmiy markazi direktori o‘rinbosari Orif Inʼomovning maʼlumot berishicha, markazga favqulodda vaziyat haqida 10:05 da xabar kelib tushgan.

“Markazimizga jami 10 nafar bemor olib kelindi. Bir nafarida biologik o‘lim qayd etilgan ekan. 8 nafar bemor ayni paytda bizda davolanmoqda. Bir nafar bemor esa davolanishni istamagani uchun uyiga javob berildi. Davolanayotgan bemorlardan ikki nafarining ahvoli og‘ir, to‘rttasi o‘rta og‘ir ahvolda, ikki nafari qoniqarli holatda”, — deydi ilmiy markaz direktori o‘rinbosari Orif Inʼomov.

“Daryo” jurnalisti bilan suhbatda bo‘lgan chaqnash sodir bo‘lgan mahallada yashovchi aholi vakillarining aytishicha, sex binosining bir qismi qulab tushgan.

“Qattiq portlash ovozi eshitildi. Men tomdan mushuk sakradi deb o‘yladim. Keyin yer qimirlab, zilziladek silkinish bo‘ldi. Ko‘chaga chiqsam, qora tutun chiqyapti. Qo‘shnimiz portlash sodir bo‘ldi dedi”, — deydi Nig‘mon Bo‘riyev.

Nig‘mon Bo‘riyevning maʼlumot berishicha, mis quvurlari ishlab chiqaruvchi sexda 200-300 nafar ishchi ishlaydi.

“Ko‘chaga chiqsam binoning bir qismi yo‘q ekan. Demak qattiq portlash sodir bo‘lgan. Bu yerda 200-300 nafar kishi 24 soat ishlaydi. O‘lim sodir bo‘lishi tayin”, — deydi otaxon.

“Daryo” jurnalisti bilan suhbatda bo‘lgan 20 yoshli marhumning qo‘shnilariga ko‘ra, Murodni beton bo‘laklari bosib qolgan bo‘lishi mumkin.

“Beton bo‘laklari bosib qolgan deyishmoqda. Endigina 20 yoshga to‘lgandi. Ota-onasiga juda og‘ir bo‘ldi”, — deydi marhumning qo‘shnilaridan biri ekanini aytgan suhbatdosh.

“Daryo” voqealar rivojini kuzatishda davom etadi.