20 ёшли йигит вафот этди, 2 беморнинг аҳволи оғир: Тошкентдаги цехда содир бўлган портлаш оқибатлари ҳақида репортаж (видео)

Тошкент шаҳрининг Чилонзор туманидаги мис қувурлари ишлаб чиқарувчи цехда содир бўлган портлаш оқибатида эндигина 20 ёшга тўлган Мурод исмли йигит вафот этди. Икки нафар беморнинг аҳволи оғир. Бу ҳақда воқеа жойида бўлган “Дарё” мухбири хабар бермоқда.

Фавқулодда вазиятлар вазирлиги берган дастлабки маълумотга кўра, Астробод кўчасида жойлашган мис қувурлари ишлаб чиқариш цехининг бир қаватли бостирмаси (ангар)да ҳаво-газ аралашмаси чақнаши содир бўлган. Дастлабки маълумотларда 6 нафар фуқаро турли даражада тан жароҳати олиб, Республика шошилинч тиббий ёрдам илмий марказига ётқизилгани айтилганди.

Кейинроқ ҳодиса оқибатида бир нафар фуқаро воқеа жойида вафот этгани, 16 нафар фуқаро турли даражада тан жароҳати олиб, шифохонага ётқизилгани хабар берилди.

Республика шошилинч тиббий ёрдам илмий маркази директори ўринбосари Ориф Инъомовнинг маълумот беришича, марказга фавқулодда вазият ҳақида 10:05 да хабар келиб тушган.

“Марказимизга жами 10 нафар бемор олиб келинди. Бир нафарида биологик ўлим қайд этилган экан. 8 нафар бемор айни пайтда бизда даволанмоқда. Бир нафар бемор эса даволанишни истамагани учун уйига жавоб берилди. Даволанаётган беморлардан икки нафарининг аҳволи оғир, тўрттаси ўрта оғир аҳволда, икки нафари қониқарли ҳолатда”, — дейди илмий марказ директори ўринбосари Ориф Инъомов.

“Дарё” журналисти билан суҳбатда бўлган чақнаш содир бўлган маҳаллада яшовчи аҳоли вакилларининг айтишича, цех биносининг бир қисми қулаб тушган.

“Қаттиқ портлаш овози эшитилди. Мен томдан мушук сакради деб ўйладим. Кейин ер қимирлаб, зилзиладек силкиниш бўлди. Кўчага чиқсам, қора тутун чиқяпти. Қўшнимиз портлаш содир бўлди деди”, — дейди Ниғмон Бўриев.

Ниғмон Бўриевнинг маълумот беришича, мис қувурлари ишлаб чиқарувчи цехда 200-300 нафар ишчи ишлайди.

“Кўчага чиқсам бинонинг бир қисми йўқ экан. Демак қаттиқ портлаш содир бўлган. Бу ерда 200-300 нафар киши 24 соат ишлайди. Ўлим содир бўлиши тайин”, — дейди отахон.

“Дарё” журналисти билан суҳбатда бўлган 20 ёшли марҳумнинг қўшниларига кўра, Муродни бетон бўлаклари босиб қолган бўлиши мумкин.

“Бетон бўлаклари босиб қолган дейишмоқда. Эндигина 20 ёшга тўлганди. Ота-онасига жуда оғир бўлди”, — дейди марҳумнинг қўшниларидан бири эканини айтган суҳбатдош.

“Дарё” воқеалар ривожини кузатишда давом этади.