Qirg‘iziston mudofaa salohiyatini oshirish maqsadida Mi-17 vertolyotlarini sotib olishni rejalashtirmoqda. Bu haqda Respublika prezidenti Sadir Japarovga tayanib, 24.kg xabar berdi.
“Global jarayonlarni inobatga olgan holda mamlakat milliy xavfsizligini mustahkamlash choralarini ko‘rish muhim. Buning uchun avvalroq harbiy texnika va qurol-yarog‘lar, jumladan nafaqat Bayraktar va Pechora (zenit-raketa tizimi), balki butunlay yangi qurollar sotib olingan. Biz Mi-17 vertolyotlarini ham xarid qilishni rejalashtirmoqdamiz”, — dedi u.
Japarovga ko‘ra, xalqaro terroristik guruhlar Markaziy Osiyoning barcha davlatlariga xavf solib, mudofaa qobiliyatini oshirishni talab qilmoqda. Siyosatchi qurolli kuchlar holatini yaxshilash maqsadida Rossiya tomoni bilan hamkorlikda ishlar olib borilayotganini aytdi.
“Bizga qarshi qurolli tajovuz sodir etilganda, fuqarolarimiz halok bo‘lganida, uylarimiz va boshqa infratuzilmalarimiz vayron bo‘lganida va yoqib yuborilganda, shunchaki qarab o‘tira olmaymiz. Har qanday tajovuzkorga javob berishga tayyormiz”, — dedi Japarov.
Uning so‘zlariga ko‘ra, mamlakat rasmiylari davlatning mudofaa qobiliyatini oshirish bo‘yicha tinimsiz harakat qilmoqda.
“Qirg‘iziston tinchliksevar mamlakat. Biz boshqa davlatga hujum qilmoqchi emasmiz va bunday rejalarimiz ham yo'q. Har qanday konfliktning oldini olish yoki faqat diplomatiya yo‘li bilan hal qilish mumkin, deb hisoblayman. Ichki va tashqi siyosatda shu tamoyilga amal qilamiz.
Afsuski, hozirgi kunda dunyoda murakkab vaziyat yuzaga kelmoqda. U nafaqat mintaqaviy, balki jahon miqyosida ham harbiy-siyosiy harakatlar bilan birga tez o‘zgarib bormoqda. Bularning barchasi harbiy va davlat tizimini mustahkamlash zarurligini eslatib, harbiy xavfsizlikka tahdidlar kuchayib borayotganidan dalolat beradi”, — dedi Qirg‘iziston prezidenti.
Izoh (0)