Қирғизистон мудофаа салоҳиятини ошириш мақсадида Ми-17 вертолётларини сотиб олишни режалаштирмоқда. Бу ҳақда Республика президенти Садир Жапаровга таяниб, 24.кг хабар берди.
“Глобал жараёнларни инобатга олган ҳолда мамлакат миллий хавфсизлигини мустаҳкамлаш чораларини кўриш муҳим. Бунинг учун аввалроқ ҳарбий техника ва қурол-яроғлар, жумладан нафақат Bayraktar ва Печора (зенит-ракета тизими), балки бутунлай янги қуроллар сотиб олинган. Биз Ми-17 вертолётларини ҳам харид қилишни режалаштирмоқдамиз”, — деди у.
Жапаровга кўра, халқаро террористик гуруҳлар Марказий Осиёнинг барча давлатларига хавф солиб, мудофаа қобилиятини оширишни талаб қилмоқда. Сиёсатчи қуролли кучлар ҳолатини яхшилаш мақсадида Россия томони билан ҳамкорликда ишлар олиб борилаётганини айтди.
“Бизга қарши қуролли тажовуз содир этилганда, фуқароларимиз ҳалок бўлганида, уйларимиз ва бошқа инфратузилмаларимиз вайрон бўлганида ва ёқиб юборилганда, шунчаки қараб ўтира олмаймиз. Ҳар қандай тажовузкорга жавоб беришга тайёрмиз”, — деди Жапаров.
Унинг сўзларига кўра, мамлакат расмийлари давлатнинг мудофаа қобилиятини ошириш бўйича тинимсиз ҳаракат қилмоқда.
“Қирғизистон тинчликсевар мамлакат. Биз бошқа давлатга ҳужум қилмоқчи эмасмиз ва бундай режаларимиз ҳам йўқ. Ҳар қандай конфликтнинг олдини олиш ёки фақат дипломатия йўли билан ҳал қилиш мумкин, деб ҳисоблайман. Ички ва ташқи сиёсатда шу тамойилга амал қиламиз.
Афсуски, ҳозирги кунда дунёда мураккаб вазият юзага келмоқда. У нафақат минтақавий, балки жаҳон миқёсида ҳам ҳарбий-сиёсий ҳаракатлар билан бирга тез ўзгариб бормоқда. Буларнинг барчаси ҳарбий ва давлат тизимини мустаҳкамлаш зарурлигини эслатиб, ҳарбий хавфсизликка таҳдидлар кучайиб бораётганидан далолат беради”, — деди Қирғизистон президенти.
Изоҳ (0)