Rossiyaning “Rosatom” davlat korporatsiyasi Qirg‘izistonda kichik atom elektr stansiyasini qurish niyatida. Bu haqda “Peretok.ru” xabar berdi.
“Mening fikrimcha, jahon eksporti uchun shunday flagman bo‘ladigan bizning birinchi eksport jo‘natmamiz Qirg‘izistonga bo‘ladi. Qirg‘iziston Rossiya texnologiyasidan foydalangan holda kichik atom elektr stansiyasini qurish bo‘yicha eng katta dinamikani namoyish etmoqda”, — dedi Rossiya kompaniyasi rahbari Aleksey Lixachev Yevrosiyo kongressida.
“Atomenergoprom” yillik hisobotida ma’lum qilishicha, “Rosatom” Qirg‘iziston, shuningdek, Myanma uchun kichik zavodning dastlabki texnik-iqtisodiy asoslash ishlarini 2023-yilda yakunlashni rejalashtirmoqda.
Bundan tashqari, joriy yilda dastlabki texnik-iqtisodiy asoslarni Hindistondagi kichik atom elektr stansiyasiga topshirish rejalashtirilgan.
2022-yilning noyabrida Rusatom Energy Projects va Qirg‘iziston Energetika vazirligi “Atomexpo-2022” ko‘rgazmasi doirasida mamlakatda kichik quvvatli atom elektr stansiyasini qurish bo‘yicha dastlabki texnik-iqtisodiy asoslash bo‘yicha texnik topshiriqlarni imzolagan edi.
Muzokaralar chog‘ida Qirg‘iziston Sog‘liqni saqlash vazirligi va “Rosatom” o‘rtasida sog‘liqni saqlashda energiya bo‘lmagan yadro texnologiyalarini qo‘llash bo‘yicha o‘zaro anglashuv va hamkorlik memorandumi imzolandi.
Ushbu hujjat Qirg‘izistonda yuqori texnologiyali tibbiyot loyihalarini birgalikda ishlab chiqishga qaratilgan.
“Gap Milliy onkologiya va gematologiya markazi negizida onkologik va boshqa kasalliklarni tashxislash va davolashning ilg‘or usullari qo‘llanadigan radiofarmatsevtika dorixonasi va molekulyar tomografiya markazini tashkil etish haqida bormoqda”, — deyiladi Qirg‘iziston respublikasi Vazirlar Mahkamasida.
O‘zbekistonda atom energetikasi bilan bog‘liq vaziyat qanday?
O‘zbekistonda atom energiyasi manbalari ham faol rivojlanmoqda. 2033-yilda O‘zbekiston hukumati birinchi atom elektr stansiyasini ishga tushirishni rejalashtirmoqda. Uning qurilishi 11 milliard dollarga baholanmoqda.
Atom elektr stansiyasi VVER-1200 reaktorlariga ega ikkita 3+ avlod energiya bloklarini o‘z ichiga oladi. AESning umumiy quvvati 2,4 GVtni tashkil qiladi.
Toshkent AQSH, Xitoy, Fransiya va Janubiy Koreya kompaniyalari tomonidan atom elektr stansiyalarini qurish imkoniyatlarini ko‘rib chiqdi.
Natijada tanlov Rossiya foydasiga amalga oshirildi. “O‘zatom” agentligi rahbari Jo‘rabek Mirzamaxmudovning so‘zlariga ko‘ra, bu qaror “respublikaning sof iqtisodiy manfaatlaridan kelib chiqqan holda” qabul qilingan va “spontan yoki siyosiy” emas.
2017-yil 29-dekabr kuni Rossiya va O‘zbekiston hukumatlari o‘rtasida atom energetikasi sohasida hamkorlik to‘g‘risidagi bitim imzolangan edi. Hujjatni tayyorlash olti oy davom etdi.
2018-yilning 7-sentabr kuni Moskvada O‘zbekiston hududida atom elektr stansiyasini qurish bo‘yicha kelishuv imzolangan edi.
Jizzax viloyatining Forish tumanidagi Aydarko‘l ko‘li yaqinidagi, Navoiy viloyati bilan chegaradosh hudud atom elektr stansiyasini qurish uchun ustuvor joy sifatida tanlandi.