Қашқадарё вилоятининг Қарши туманидаги Чароғил қишлоғида ғалла етиштирувчи 54 та фермер хўжалигининг 52 тасида етиштирилган ғалла ўз вақтида ўриб олинди. Туман ҳокими қаҳрига учрагани айтилаётган иккита фермер хўжалиги — “ШДФ замин равнақи” ва “Паризода Рўзиқулова” фермер хўжалигига қарашли 37 гектар майдондаги ғалла эса ҳали-ҳамон ўриб олинмаган. Бу ҳақда “Дарё”га мурожаат қилган фермерларнинг айтишича, мазкур майдондаги ғаллани ўришга киришган комбайнларга ҳам ҳоким тақиқи қўйилган.
“Биз пахта етиштириш бўйича аввалдан ҳамкорлик қилиб келганимиз Нақшаб кластери билан ишлаяпмиз. Туманимизда аввалига кооперация айни пайтда эса кластер сифатида фаолият юритаётган тадбиркорлар билан ишламаяпмиз. Биринчидан аввалдан ўша Нақшаб кластери ўзимизга маъқул келгани учун, қолаверса ишончимизни қозонгани учун эски ҳамкорликни давом эттираётгандик. Эндиликда туман ҳокими бизга шарт қўйиб, эски кластер билан ҳамкорликни тўхтатиб, тумандаги кластер билан ишлаш мажбуриятини қўймоқда. Агар бундай қилмасак, ғалламизга комбайн кирмаслиги, ғалламиз ўрилмай қолишини айтмоқда”, — дейди бу ҳақда таҳририятга мурожаат қилган фермерлардан бири “Паризода Рўзиқулова” фермер хўжалиги раҳбари Бекзод Фармонов.
Яна бир фермер “ШДФ замин равнақи” фермер хўжалиги раҳбари Равшан Юсуповнинг айтишича, улар ўзи истаган кластер билан ҳамкорлик қилгани учун ҳоким қаҳрига учган.
“17 гектар майдонга ғалла етиштирганмиз. Ғалламиз тайёр. Лекин ғаллани ўришга комбайн берилмаяпти. Сабаби туман ҳокимимиз айтган кластер билан эмас, аввалдан ишлаб келган кластер-ҳамкоримиз билан ишлаб келаётгандик. Бу ҳокимга ёқмагани учун ҳоким бизга тумандаги кластер билан ишлаш шартини қўймоқда. Агар эски ҳамкоримиз билан ишлашда давом этсак, ғалламизга комбайн берилмаслиги, шунча меҳнатимизга куйиб қолишимиз айтилди”, — дейди фермер Равшан Юсупов.
“Дарё” фермерлар айблови бўйича Қарши тумани ҳокимлиги масъуллари билан мулоқот қилди.
Таҳририятнинг бу ҳақдаги саволларига жавоб берган Қарши тумани ҳокимлиги ахборот хизмати раҳбари Тўлқин Турдиев шахсан ҳокимнинг ўзи фермерлар иддаосини рад этганини, Чароғил ҳудудидаги фермерлар ғалласи навбати билан ўриб келинаётганини маълум қилди.
“Бу масалада ҳеч қандай муаммо йўқ. Фермерларга бундай тақиқ қўйилмаган. Чароғил ҳудудидаги мавжуд 54 та фермернинг ғалла майдони навбати билан ўрилмоқда. Шу кеча кундузгача 50 та фермер ғалласи ўрилган бўлса, кеча кечаси қолган тўртта фермерлардан бирининг ғалласи ўрилган. Айни пайтда эса (соат 15:30 лар атрофи — таҳр.) ўша тўртта фермер хўжалигидан яна бирининг даласи ўрилмоқда. Сизга шикоят қилган иккита фермер хўжалигининг ғалласи эса бугун кечки пайт ўриб олинади”, — дейди ҳокимлик ахборот хизмати раҳбари Тўлқин Турдиев.
Мақола эълон қилинаётган пайтда фермер Бекзод Фармонов таҳририятга алоқага чиқиб, “Дарё” сўровидан сўнг ҳокимлик масъулларидан иборат вакиллар келиб, ғалла ўримига яроқсиз бўлган 2 та комбайн келтиришганини, аммо бу комбайнлар ғалла ўримига яроқсиз бўлгани боис, ғалласи бу комбайнлар билан ўрилишига қаршилик қилганини билдирди.
“Дарё” воқеалар ривожини кузатишда давом этади.
Изоҳ (0)