Seysmik hodisalarni o‘rganish bilan shug‘ullanuvchi Norvegiyaning NORSAR tadqiqot tashkiloti mutaxassislari Xersondagi Kaxovka GES to‘g‘oni buzilgan kuni stansiya hududida portlash sodir bo‘lganini aniqladi. Bu haqda tashkilot saytida xabar berildi.

Mintaqaviy seysmik stansiyalardan olingan ma’lumotlarga ko‘ra, portlash 6-iyun kuni Xerson vaqti bilan 02:54 (Norvegiya vaqti bilan 01:54) da sodir bo‘lgan. OAV xabarlarida xuddi shu vaqt atrofida to‘g‘on qulagani aytiladi.

“Biz portlash hodisasiga xos bo‘lgan fokuslangan energiya zarbasini ko‘ryapmiz”, — dedi NORSAR seysmologi Voker Oye AQSHning NPR radiostansiyasiga bergan intervyusida.

Shu bilan birga NPR mutaxassislari portlash nuqtasini aniqlay olmaganini ta’kidlamoqda — ularning so‘zlariga ko‘ra, bu Kaxovka GESdan 20—30 kilometr radiusda sodir bo‘lgan. Oye radiostansiyaga bergan izohida, bu joyda portlashlar kamdan-kam sodir bo‘lishini ta’kidladi, shuning uchun buni tasodif deb hisoblash qiyin.

NORSAR qayd etgan hodisaning seysmik magnitudasi 1 dan 2 gacha baholanadi, bunday past magnituda qurilma sezgirligi chegarasida joylashgan. Bu shuni anglatadiki, hodisani batafsil o‘rganish va portlash haqida qo‘shimcha ma’lumotlarni olish ancha qiyin bo‘ladi.

Fizik Richard Kordaro 6-iyun kuni Twitter’da Buxarestdagi magnitometr Kaxovka GES yaqinida portlashga o‘xshash signallarni qayd etganini yozgandi.

Kaxovka GES vayron bo‘lishi

Xerson viloyatining Rossiyaga qo‘shib olingan qismidagi Kaxovka GES to‘g‘oni 6-iyun kuni ertalab vayron bo‘ldi — Dneprning quyi oqimiga suv quyila boshlandi, oqibatda minglab turar joy binolari suv ostida qoldi.

Rossiya rasmiylarining ta’kidlashicha, to‘g‘onning buzilishiga Ukraina Qurolli kuchlarining o‘qqa tutishi sabab bo‘lgan. Kiyev rus harbiylari stansiyani ichkaridan portlatganini da’vo qilmoqda. To‘g‘on urush paytida yetkazilgan zarar va Kaxovka suv omboridagi “misli ko‘rilmagan” suv sathi tufayli o‘z-o‘zidan qulagan degan versiya ham mavjud.