Россиялик ҳарбийлар Украина армиясининг Херсон вилоятига ҳужум қилиши эҳтимолини истисно қилиш мақсадида Каховка ГЭС тўғонини “портлатган”. Бу ҳақда Украина мудофаа вазири ўринбосари Анна Маляр маълум қилди.
“Каховка ГЭСнинг портлатилиши, шубҳасиз, Украина мудофаа кучларининг Херсон йўналишидаги ҳужумининг олдини олиш, Запорожье ва Бахмут йўналишларига ўтказишга мўлжалланган зарур захираларни бўшатиш учун амалга оширилган”, — дейди у.
Малярнинг сўзларига кўра, рус армиясининг энг жанговар бўлинмаларини Херсон вилоятидан кўчириш аллақачон бошланган. Биринчи навбатда, денгиз пиёдалари ва ҳаво-десант қўшинлари бўлинмалари кўчирилмоқда.
Россия расмийлари ҳозирча Малярнинг баёнотига изоҳ бермаган.
Россия версияси
Россия расмийларининг таъкидлашича, Каховка ГЭС тўғонининг вайрон бўлиши Украина Қуролли кучларининг станцияга қилинган ҳужумлари билан боғлиқ. Киев маълумотларига кўра, Россия ҳарбийлари тўғонни ичкаридан портлатган. Каховка сув омборидаги сув сатҳининг юқорилиги ва уруш пайтида кўрилган зарар туфайли тўғон ўз-ўзидан қулаши мумкин деган версия ҳам мавжуд.
Шунга қарамай, сейсмик ҳодисаларни ўрганиш билан шуғулланувчи НОРSAР тадқиқот ташкилоти мутахассислари тўғон қулаган куни станция яқинида портлаш содир бўлганини кўрсатадиган сигналларни қайд этди. Бундан ташқари, Жо Байден маъмуриятидаги New York Times манбасининг айтишича, америкалик жосус сунъий йўлдошлар тўғон вайрон бўлишидан олдин портлаш содир бўлганини аниқлаган.
Изоҳ (0)